२ अर्ब १६ करोडभन्दा बढीको क्रिप्टो कारोबारको आरोपमा धनुषाका २८ वर्षीय युवक पक्राउ

बिरगंज, पर्सा, १३ कार्तिक 

काठमाडौं । अवैध क्रिप्टोकरेन्सी कारोबार तथा अनलाइन बेटिङमा संलग्न रहेको आरोपमा प्रहरीले धनुषाका एक २८ वर्षीय युवकलाई पक्राउ गरेको छ।

पक्राउ पर्नेमा धनुषाको सबैला नगरपालिका–१२ निवासी सुनिलकुमार यादव रहेका छन्।

काठमाडौं उपत्यका अपराध अनुसन्धान कार्यालय, टेकुका अनुसार यादवले ‘बाइनान्स’ एपमार्फत ठूलो परिमाणमा क्रिप्टोकरेन्सी कारोबार तथा अनलाइन सट्टेबाजी (बेटिङ) गराउँदै आएको विशेष सूचनाका आधारमा प्रहरीले अनुसन्धान अघि बढाएको थियो।

प्रहरीले गरेको सूक्ष्म निगरानी तथा प्राविधिक विश्लेषणका क्रममा यादवको बाइनान्स आईडीमार्फत २ करोड ६९ लाख ९१ हजार ३८८ अमेरिकी डलर बराबरको कारोबार भएको खुलेको जनाएको छ।

प्रहरीले उल्लेख गरेको प्रतिअमेरिकी डलर १५१ रुपैयाँ ५३ पैसाको विनिमय दरअनुसार उक्त कारोबारको नेपाली मूल्य २ अर्ब १६ करोड १ लाख २० हजार ८२१ रुपैयाँ हुन आउँछ।

जिल्ला प्रहरी कार्यालय धनुषाको समन्वयमा पक्राउ परेका यादवलाई थप अनुसन्धान तथा कानुनी कारबाहीका लागि काठमाडौं ल्याइएको प्रहरीले जनाएको छ।

यादवविरुद्ध मुलुकी अपराध संहिता, २०७४ को परिच्छेद–५ अन्तर्गत दफा १२५ (जुवा खेल्न वा सट्टेबाजी गर्न नहुने) तथा दफा २६२ (क)(१) (अभौतिक मुद्राको प्रयोग गर्न नहुने) सम्बन्धी कसुरमा अनुसन्धान अघि बढाइएको छ।

यस सम्बन्धमा काठमाडौं जिल्ला अदालत, बबरमहलबाट म्याद थप गरी थप अनुसन्धान भइरहेको काठमाडौं उपत्यका अपराध अनुसन्धान कार्यालयका सूचना अधिकारी एवं प्रहरी उपरीक्षक रामेश्वर कार्कीले जानकारी दिएका छन्।

प्रहरीले घटनाबारे थप अनुसन्धान गरिरहेको जनाएको छ।