बिरगंज, पर्सा, २१ कार्तिक 

काठमाडौं । नेपाली कांग्रेसका पूर्वसभापति शेरबहादुर देउवा पत्रकारको एक प्रश्नपछि आक्रोशित बनेका छन्। पार्टीको आधिकारिक नेतृत्वबारे सोधिएको प्रश्नमा देउवाले असन्तुष्टि जनाउँदै पत्रकारलाई पहिले नै जवाफ दिइसकेको भन्दै प्रतिक्रिया दिएका हुन्।

 

शनिबार काठमाडौंमा आयोजित नेपाली कांग्रेसको १५औँ अधिवेशनअन्तर्गत आफ्नो पक्षले राष्ट्रिय सभागृहमा आयोजना गरेको समानान्तर अधिवेशनमा सहभागी भएर बाहिरिने क्रममा सञ्चारकर्मीहरूले देउवालाई विभिन्न प्रश्न गरेका थिए।

 

सोही क्रममा एक पत्रकारले, ‘नेपाली कांग्रेसको सभापति तपाईं हो कि गगन थापा हो ?’ भन्दै प्रश्न गरेका थिए।

 

प्रश्न सुन्नासाथ देउवा आक्रोशित हुँदै औँलो ठड्याएर जवाफ दिएका थिए, ‘त्यहाँ बोलिसकेँ मैले ! त्यहाँ बोलिसकेँ त ! ए भाइ, त्यहाँ बोलेको सुन्नुभएन तपाईंले ?’

 

पत्रकारले आफ्नो प्रश्नको स्पष्ट जवाफ माग्दै पुनः जिज्ञासा राखेपछि देउवाले ‘त्यही हो ! मैले बोलिसकेको छु’ भन्दै थप प्रतिक्रिया दिएका थिए।

 

यसैबीच सञ्चारकर्मीहरूले पछिल्लो समय चर्चामा रहेको १८ करोड रुपैयाँसम्बन्धी विवाद र त्यस विषयमा सरकारले छानबिन तथा कारबाही गर्नुपर्ने वा नपर्नेबारे पनि प्रश्न गरेका थिए। तर देउवाले यस विषयमा स्पष्ट जवाफ नदिई ‘नेपाल सरकारलाई सोध्नुस् न’ भन्दै प्रतिक्रिया दिएका थिए।

 

यसअघि अधिवेशनलाई सम्बोधन गर्ने क्रममा देउवाले पार्टीभित्र १८ करोड रुपैयाँको आर्थिक चलखेल भएको भन्दै असन्तुष्टि व्यक्त गरेका थिए। उनले पार्टीभित्रको आर्थिक गतिविधि र नेतृत्वसँग जोडिएका विषयमा आफ्नो धारणा राखेका थिए।

 

कार्यक्रमस्थलबाट बाहिरिने क्रममा पनि पत्रकारहरूले पार्टीको नेतृत्व र पछिल्लो विवादबारे निरन्तर प्रश्न गरेपछि देउवा थप प्रतिक्रिया नदिई गाडी चढेर बाहिरिएका थिए।

 

बिरगंज, पर्सा, २१ कार्तिक 

काठमाडौं । नेपाली कांग्रेसका पूर्वसभापति शेरबहादुर देउवाले पार्टीभित्र देखिएको आर्थिक चलखेल र पछिल्लो समय चर्चामा रहेको १८ करोड रुपैयाँसम्बन्धी अडियो प्रकरणप्रति असन्तुष्टि व्यक्त गरेका छन्।

 

नेपाली कांग्रेस काठमाडौं जिल्ला कार्यसमिति (देउवा पक्ष) ले शनिबार राष्ट्रिय सभागृहमा आयोजना गरेको १५औँ जिल्ला अधिवेशन उद्घाटन समारोहलाई सम्बोधन गर्दै देउवाले पैसाको बलमा पार्टीको नेतृत्व र प्रतिष्ठामाथि प्रश्न उठाउने प्रवृत्ति स्वीकार्य नहुने बताएका हुन्।

 

सामाजिक सञ्जालमा सार्वजनिक भएको इनम सापकोटासँग सम्बन्धित भनिएको विवादास्पद अडियो प्रकरणको प्रसंग उठाउँदै देउवाले १८ करोड रुपैयाँको विषयलाई लिएर आश्चर्य व्यक्त गरे।

 

‘इनम सापकोटाले १८ करोड भनेको छ, बाफ रे बाफ ! १८ करोड सानो पैसा हो र ? त्यो पैसा दिएर पार्टी किन्ने ? अब पैसामा पार्टी बेच्ने हामीले ?’ देउवाले प्रश्न गरे।

 

उनले नेपाली कांग्रेसको इतिहास, विचार र राजनीतिक संघर्षलाई पैसासँग तुलना गर्न नमिल्ने धारणा राखे। लामो राजनीतिक संघर्ष र जेलनेल भोगेर पार्टी निर्माणमा योगदान दिएको स्मरण गर्दै उनले आर्थिक प्रभावका आधारमा पार्टी कब्जा गर्ने प्रयास स्वीकार्य नहुने बताए।

 

विशेष महाधिवेशनप्रति देउवाको असन्तुष्टि

 

सम्बोधनका क्रममा देउवाले पार्टीभित्रको विवाद समाधानका लागि नियमित वा विशेष महाधिवेशनको बाटो अपनाउनुपर्ने धारणा पनि व्यक्त गरे।

 

उनले विगतमा सुवर्णशमशेर राणाको सभापतित्वकालदेखि आफू सभापति हुँदा समेत विशेष महाधिवेशनको अभ्यास भएको स्मरण गराए। पार्टीभित्र असहमति भए विधि र प्रक्रियाअनुसार अघि बढ्नुपर्ने उनको भनाइ थियो।

 

देउवाले आफूलाई अब धेरै पदको आकांक्षा नरहेको उल्लेख गर्दै सम्मानजनक अवकाश चाहेको बताए।

 

‘मलाई धेरै पदको रहर छैन, म त अनरेबल रिटायरमेन्ट चाहन्छु,’ उनले भने।

 

देउवा पक्षको अधिवेशनमा शीर्ष नेताहरूको उपस्थिति

 

काठमाडौंमा आयोजित उक्त अधिवेशनमा देउवासहित कांग्रेसका नेता डा. शशांक कोइराला, प्रकाशमान सिंह, प्रकाशशरण महत र मोहनबहादुर बस्नेतलगायत नेताहरू सहभागी थिए।

 

पार्टीभित्रको विवाद र नेतृत्वसम्बन्धी मतभेदका बीच आयोजित यस कार्यक्रमलाई देउवा पक्षले राजनीतिक रूपमा महत्त्वपूर्ण मानेको छ।

 

देउवाले काठमाडौं जिल्ला राजधानीसमेत भएकाले यहाँ हुने राजनीतिक गतिविधिको प्रभाव देशभर मात्र नभई अन्तर्राष्ट्रिय स्तरसम्म पर्ने उल्लेख गर्दै अधिवेशनको विशेष महत्त्व रहेको बताए।

 

उनको सम्बोधनले कांग्रेसभित्रको आन्तरिक विवाद, आर्थिक पारदर्शिता र पार्टी नेतृत्वसम्बन्धी बहसलाई पुनः चर्चामा ल्याएको छ।

 

जनकपुरधाम २१ कात्तिक ।

सर्लाहीमा मोटरसाइकलको पेट्रोल ट्याङ्कीभित्र लुकाएर भारतबाट नेपाल ल्याउँदै गरिएको १२९ बोतल प्रतिबन्धित लागुऔषध कोरेक्स सशस्त्र प्रहरीले बरामद गरेको छ ।

ब्रह्मपुरी गाउँपालिका–४ स्थित त्रिभुवननगरमा सहायक सीमा स्तम्भ नम्बर ३२४/३ नजिक दशगजा क्षेत्रमा खटिएको सशस्त्र प्रहरीको गस्ती टोलीले शुक्रबार उक्त लागुऔषध बरामद गरेको हो ।

सशस्त्र प्रहरी बल नेपाल, बीओपी त्रिभुवननगरबाट सशस्त्र प्रहरी नायब निरीक्षक बलदेव राज पाण्डेको कमान्डमा खटिएको चार सदस्यीय मोटरसाइकल गस्ती टोलीले भारतबाट नेपालतर्फ आउँदै गरेको बीआर ०१ एफभी ३३३१ नम्बरको मोटरसाइकललाई रोक्न खोजेको थियो ।

तर, प्रहरी टोलीलाई देखेपछि चालकले मोटरसाइकल खोला किनारमा छाडेर भारततर्फ फरार भएका थिए । त्यसपछि प्रहरीले मोटरसाइकल नियन्त्रणमा लिएर जाँच गर्दा पेट्रोल ट्याङ्कीभित्र लुकाएर राखिएका १०० एमएलका १२९ बोतल कोरेक्स फेला पारेको हो ।

बिरगंज, पर्सा, २१ कार्तिक 

काठमाडौं । सर्वोच्च अदालतको न्यायाधीशमा प्रस्तावित जनक पाण्डेले न्याय सम्पादनका क्रममा आफूले राजनीतिक विचार, आस्था र प्रभावलाई अदालतबाहिरै छाड्ने गरेको बताएका छन् ।

 

शनिबार संसदीय सुनुवाइ समितिमा भएको सुनुवाइका क्रममा सांसदहरूले उनको न्यायिक निष्पक्षता र विगतका फैसलाबारे प्रश्न उठाएका थिए । सोही क्रममा नेकपा एमालेकी सांसद पद्मा अर्यालले नक्कली भुटानी शरणार्थी प्रकरणमा पूर्वगृहमन्त्री बालकृष्ण खाणसम्बन्धी मुद्दामा फरक राय दिएको विषय उठाउँदै न्यायिक निष्पक्षता र जवाफदेहिताबारे प्रश्न गरेकी थिइन् ।

 

जवाफमा पाण्डेले न्यायाधीश भएपछि राजनीतिक आग्रह र पूर्वाग्रहबाट मुक्त भएर प्रमाण तथा मिसिलका आधारमा निर्णय गर्ने गरेको स्पष्ट पारे ।

 

‘म अदालतमा आइसकेपछि राजनीतिको चप्पल बाहिरै खोलेको छु । हामी न्यायाधीश भएपछि राजनीति गर्दैनौँ र गर्नु पनि हुँदैन,’ उनले भने ।

 

उनले अदालतमा राजनीतिक पृष्ठभूमि भएका व्यक्ति तथा दलसँग सम्बन्धित धेरै मुद्दा आउने भए पनि इजलासमा बसेपछि राजनीतिक विषयभन्दा प्रमाण र मिसिल महत्वपूर्ण हुने बताए ।

 

भुटानी शरणार्थी प्रकरणमा बालकृष्ण खाणलाई थुनामा राख्ने वा धरौटीमा छाड्ने भन्ने विषयमा आफूले तत्काल प्राप्त प्रमाणका आधारमा राय दिएको पाण्डेको भनाइ थियो ।

 

उक्त मुद्दामा आफू र अर्का न्यायाधीश प्रकाश खरेलबीच फरक राय आएको उनले स्पष्ट पारे । आफ्नो राय नै अन्तिम फैसला नभएको उल्लेख गर्दै तेस्रो न्यायाधीशको इजलासबाट अन्तिम आदेश भएको उनको भनाइ थियो ।

 

पाण्डेले हेटौँडामा रहँदा बागमती प्रदेशका मुख्यमन्त्रीसम्बन्धी मुद्दामा पनि राजनीतिक प्रभावभन्दा कानुनी अवस्था र प्रमाणलाई आधार बनाएर निर्णय गरेको उदाहरण प्रस्तुत गरे ।

 

मुख्यमन्त्रीले शपथ लिइसकेको र विश्वासको मतसमेत प्राप्त गरिसकेको अवस्थामा अन्तरिम आदेश जारी गर्नु उपयुक्त नदेखिएको उनले बताए ।

 

न्यायाधीशले राजनीतिक विचार बोकेको हुन सक्ने भए पनि न्याय सम्पादन गर्दा त्यसको प्रभाव पर्न नहुनेमा जोड दिँदै पाण्डेले आफूले सधैँ निष्पक्ष र प्रमाणमा आधारित न्याय सम्पादन गर्ने प्रतिबद्धता व्यक्त गरे ।

 

संसदीय सुनुवाइ समितिमा पाण्डेको न्यायिक निष्पक्षता र विगतका फैसलाबारे सांसदहरूले विभिन्न प्रश्न उठाएका थिए ।