धादिङमा ६ वटा सवारीसाधन एकआपसमा ठोक्किए, मानवीय क्षति भएन

धादिङ । धादिङको धुनिबेशी नगरपालिका–६ स्थित मितेरी टोलमा पृथ्वी राजमार्गमा ६ वटा सवारीसाधन एकआपसमा ठोक्किँदा दुर्घटना भएको छ।

प्रहरीका अनुसार अगाडिको सवारीसाधनले अचानक ब्रेक लगाएपछि पछाडि रहेका सवारीसाधनको समयमै ब्रेक नलाग्दा एकपछि अर्को गर्दै ठोक्किएर दुर्घटना भएको हो।

दुर्घटनाका क्रममा तेल बोकेको ट्याङ्करले आफ्नो लेन मिच्दा पछाडि रहेको ट्रकमा समेत क्षति पुगेको प्रहरीले जनाएको छ।

इलाका प्रहरी कार्यालय खानीखोला, धादिङका अनुसार दुर्घटनामा हालसम्म मानवीय क्षति भएको विवरण प्राप्त भएको छैन।

घटनाको थप विवरण खुल्न बाँकी रहेको प्रहरीले जनाएको छ। दुर्घटनाबारे प्रहरीले आवश्यक विवरण संकलन तथा घटनाको थप अनुसन्धान गरिरहेको छ।