झापामा दुई राउण्ड हवाई फायरपछि १५० ग्रामभन्दा बढी ब्राउन सुगरसहित दुई जना पक्राउ

बिरगंज, पर्सा, ११ कार्तिक 

झापा। झापाको नेपाल–भारत सीमा क्षेत्रबाट प्रहरीले १५० ग्रामभन्दा बढी खैरो हेरोइन (ब्राउन सुगर) सहित दुई जनालाई पक्राउ गरेको छ। उनीहरूलाई नियन्त्रणमा लिन प्रहरीले दुई राउण्ड हवाई फायर गरेको जनाएको छ।

लागुऔषध नियन्त्रण ब्यूरोका अनुसार झापा गाउँपालिका–१ सालमारा क्षेत्रमा बुधबार गरिएको कारबाहीका क्रममा १५०.१४० ग्राम खैरो हेरोइन बरामद भएको हो।

भारतबाट लागुऔषध ल्याएर कोशी प्रदेशका विभिन्न जिल्लामा आपूर्ति गर्ने समूहको निगरानी गर्ने क्रममा लागुऔषध नियन्त्रण ब्यूरो शाखा कार्यालय काँकडभिट्टाबाट खटिएको प्रहरी टोलीले उनीहरूलाई पक्राउ गरेको हो।

प्रहरीका अनुसार भारतको कुतुवाभिट्टाबाट मोटरसाइकलमा नेपाल प्रवेश गरेका उनीहरूलाई नियन्त्रणमा लिन खोज्दा पुनः भारततर्फ भाग्न खोजेका थिए। त्यसपछि प्रहरीले चेतावनीस्वरूप दुई राउण्ड हवाई फायर गरी उनीहरूलाई नियन्त्रणमा लिएको जनाएको छ।

पक्राउ पर्नेमा झापा गाउँपालिका–१ का ३० वर्षीय सलमान मिया र ३६ वर्षीय नसिम अक्तर मिया रहेका छन्।

प्रहरीले उनीहरूको साथबाट १५०.१४० ग्राम खैरो हेरोइन, नेपाली नम्बर प्लेटको मे ७ प ३ नम्बरको सुपर स्प्लेन्डर मोटरसाइकल, भारतीय नम्बर प्लेटको बीआर ३७ एए ५३८० नम्बरको होन्डा साइन मोटरसाइकल र दुई थान मोबाइल बरामद गरेको छ।

पक्राउ परेका दुवै जनालाई थप अनुसन्धान तथा आवश्यक कानुनी कारबाहीका लागि इलाका प्रहरी कार्यालय कुमरखोद, झापामा बुझाइएको लागुऔषध नियन्त्रण ब्यूरोले जनाएको छ।