पर्सामा पटाका पड्काउने क्रममा पाँच वर्षीय बालकको जलेर मृत्यु

बिरगंज, पर्सा, २३ कार्तिक 

पर्सामा पटाका पड्काउने क्रममा शरीरमा आगो लागेर गम्भीर घाइते भएका पाँच वर्षीय बालकको उपचारका क्रममा मृत्यु भएको छ।

पर्साको पकाहाँ मैनपुर गाउँपालिका–२, मधुबनी निवासी मखु सहनीका पाँच वर्षीय छोराको पटाका पड्काउने क्रममा जलेर मृत्यु भएको हो।

प्राप्त विवरणअनुसार सोमबार बिहान करिब ८ः३० बजे पटाका पड्काउने क्रममा अचानक बालकको छातीमा आगो लागेको थियो। आगलागीबाट गम्भीर रूपमा जलेर बेहोस भएका बालकलाई तत्काल उपचारका लागि वीरगञ्जस्थित तराई अस्पताल लगिएको थियो।

अस्पतालमा उपचार भइरहेको अवस्थामा बालकको मृत्यु भएको प्रहरीले जनाएको छ।

घटनाबारे थप अनुसन्धान भइरहेको र घटनाको वास्तविक अवस्था बुझ्ने काम जारी रहेको प्रहरी नायब उपरीक्षक (डीएसपी) चक्रबहादुर मल्लले जानकारी दिएका छन्।

चाडपर्वका समयमा पटाका तथा विस्फोटक सामग्री प्रयोग गर्दा विशेष सावधानी अपनाउनुपर्ने यो घटनाले पुनः सचेत गराएको छ। विशेषगरी बालबालिकालाई यस्ता जोखिमपूर्ण सामग्रीबाट टाढा राख्न अभिभावकले ध्यान दिन आवश्यक देखिएको छ।