पर्यटक भिसामा आएर धार्मिक गतिविधिमा संलग्न भएको आरोपमा २४ कोरियाली पक्राउ

बिरगंज, पर्सा, २३ असोज 

विराटनगर । पर्यटक भिसामा नेपाल आएका २४ जना दक्षिण कोरियाली नागरिकलाई मोरङबाट प्रहरीले नियन्त्रणमा लिएको छ। पर्यटक भिसाको सर्तविपरीत धार्मिक प्रशिक्षण तथा प्रचारप्रसारमा संलग्न रहेको आरोपमा उनीहरूलाई शुक्रबार पक्राउ गरी थप अनुसन्धानका लागि अध्यागमन विभाग पठाइएको हो।

पक्राउ पर्नेमा १३ जना पुरुष र ११ जना महिला रहेका छन्। मोरङका प्रहरी प्रमुख एसपी कवित कटवालका अनुसार उनीहरूलाई विराटनगर विमानस्थलबाट यती एयरलाइन्सको जहाजमार्फत शुक्रबार साँझ काठमाडौं पठाइएको हो।

प्रहरीका अनुसार सुन्दरहरैँचा नगरपालिका–७, मालती मार्गस्थित नेपाल न्यू कोभेनन्ट कलेजमा धार्मिक प्रशिक्षण तथा कार्यक्रम सञ्चालन भइरहेका बेला उनीहरूलाई नियन्त्रणमा लिइएको हो। स्थानीयवासीबाट उजुरी प्राप्त भएपछि विदेशी नागरिकहरूको गतिविधिमाथि निगरानी बढाइएको प्रहरीले जनाएको छ।

निगरानीका क्रममा उनीहरू धर्मशास्त्रसम्बन्धी तालिममा संलग्न रहेको पाइएको एसपी कटवालले बताए।

मोरङका सहायक प्रमुख जिल्ला अधिकारी सरोज कोइरालाका अनुसार पर्यटक भिसामा नेपाल आएका विदेशी नागरिकले धार्मिक शिक्षा, तालिम वा प्रचारप्रसार गर्न नपाउने कानुनी व्यवस्थाविपरीत गतिविधि भएको सूचना प्राप्त भएपछि प्रशासनले दुई दिनदेखि निगरानी गरिरहेको थियो।

अनुसन्धानका क्रममा उनीहरूले भिसाको उद्देश्यविपरीत गतिविधि गरेको देखिएपछि जिल्ला प्रशासन कार्यालयको निर्देशनमा नियन्त्रणमा लिइएको कोइरालाले जानकारी दिए।

पक्राउ परेका दक्षिण कोरियाली नागरिक असोज २० र २१ गते काठमाडौं हुँदै विराटनगर आएका थिए। उनीहरू अक्टोबर १२ सम्म मोरङमा रहने योजनासहित नेपाल आएको बताइएको छ।

लभ नेपाल मिसनको सहयोगमा सञ्चालित नेपाल न्यू कोभेनन्ट कलेजमा धर्मशास्त्रको अध्ययन तथा अध्यापन हुँदै आएको छ। उक्त संस्थाले प्रमाणपत्र तहदेखि विद्यावारिधिसम्मको धार्मिक शिक्षा प्रदान गर्ने बताइएको छ।

सहायक प्रमुख जिल्ला अधिकारी कोइरालाका अनुसार अध्यागमन नियमावली, २०५१ को नियम २० को उपनियम (२०) अनुसार पर्यटक भिसाको दुरुपयोग गरेको देखिएपछि उनीहरूलाई अध्यागमन विभाग पठाइएको हो। उनीहरूलाई नेपालबाट निष्कासन गर्ने वा अन्य कानुनी कारबाही अघि बढाउने भन्ने निर्णय अध्यागमन विभागले गर्नेछ।

मोरङमा विदेशी नागरिकको आवागमन बढेसँगै प्रशासनले उनीहरूको गतिविधिमाथि निगरानी तीव्र बनाएको छ। प्रमुख जिल्ला अधिकारीको नेतृत्वमा रहेको अध्यागमन जिल्ला समन्वय समितिले विदेशी नागरिकले भिसाका सर्त पालना गरे–नगरेको विषयमा निगरानी गरिरहेको छ।

यसअघि विराटनगरबाट दुई जना चिनियाँ नागरिकसमेत पक्राउ परेका थिए। उनीहरूलाई पनि आवश्यक अनुसन्धानका लागि अध्यागमन विभाग पठाइएको थियो।