सोलुखुम्बुमा दुई हेलिकोप्टर आपसमा ठोक्किए, एक विदेशी नागरिकको मृत्यु, एक घाइते

बिरगंज, पर्सा, १७ कार्तिक 

काठमाडौं । सोलुखुम्बुको खुम्बु क्षेत्रमा अवतरण गर्ने क्रममा दुईवटा हेलिकोप्टर आपसमा ठोक्किँदा एक विदेशी नागरिकको मृत्यु भएको छ भने एक जना घाइते भएका छन्।

मंगलबार बिहान लुक्लाभन्दा माथि पर्ने खुम्बु पासाङल्हामु गाउँपालिका–४ स्थित फेरिचेमा फिस्टेल एयर र एयर डाइनेस्टीका हेलिकोप्टर आपसमा ठोक्किएका हुन्।

जिल्ला प्रहरी कार्यालय सोलुखुम्बुका प्रहरी निरीक्षक मौसम तामाङका अनुसार बिहान करिब ८ बजेर ११ मिनेटको समयमा दुवै हेलिकोप्टर अवतरण गर्ने क्रममा एकआपसमा ठोक्किएका थिए। दुर्घटनामा हेलिकोप्टरका पंखा आपसमा ठोक्किएको बताइएको छ।

दुर्घटनामा एक विदेशी नागरिकको मृत्यु भएको छ। मृतकको पहिचान भने खुल्न बाँकी रहेको प्रहरीले जनाएको छ।

त्यस्तै, दुर्घटनामा घाइते भएका शैलेश किसन पटेललाई उपचारका लागि प्रभु हेलिकोप्टरमार्फत काठमाडौं ल्याइएको छ। उनलाई नेपाल मेडिसिटी अस्पतालमा उपचारका लागि भर्ना गरिएको प्रहरीले जनाएको छ।

मृतकको शव भने थप प्रक्रिया तथा व्यवस्थापनका लागि लुक्ला ल्याइएको प्रहरी निरीक्षक तामाङले जानकारी दिएका छन्।

दुर्घटनाबारे थप विवरण आउन बाँकी रहेको छ।

समाचार स्रोत : उपलब्ध प्रहरी जानकारी तथा प्रकाशित समाचार।