तरकारीभित्र लुकाएर भारततर्फ गाँजा तस्करीको प्रयास, मोरङमा ५७० किलो बरामद

बिरगंज, पर्सा, २५ असोज 

विराटनगर । मोरङमा तरकारी बोकेको पिकअप भ्यानभित्र लुकाएर राखिएको ५७० किलो गाँजा सशस्त्र प्रहरीले बरामद गरेको छ। नेपाल–भारत सीमा क्षेत्रनजिकै शनिबार राति सशस्त्र प्रहरीले शंकास्पद अवस्थामा रहेको पिकअप भ्यान नियन्त्रणमा लिएर जाँच गर्दा ठूलो परिमाणमा गाँजा फेला परेको हो।

मोरङको जहदा गाउँपालिका–४ रामचोकमा राति करिब ११ बजे प्र १–०१–०० च ७४२२ नम्बरको महेन्द्र पिकअप भ्यान जाँच गर्न खोज्दा चालक गाडी छाडेर फरार भएका थिए।

सशस्त्र प्रहरी बल नेपाल बोर्डर आउट पोस्ट (बीओपी) नोचाबाट खटिएको टोलीले नियन्त्रणमा लिएको उक्त भ्यान खानतलासी गर्दा स्कुस र बन्दाकोबीको बीचमा लुकाएर राखिएका १९ पोका गाँजा फेला पारेको सशस्त्र प्रहरी बल मोरङका प्रमुख एसपी गेहेन्द्रबहादुर भण्डारीले जानकारी दिए।

उनका अनुसार बरामद गाँजाको तौल गर्दा ५७० किलो रहेको पुष्टि भएको छ।

प्रारम्भिक अनुमानअनुसार तरकारी ओसारपसार गर्ने आवरणमा गाँजा भारततर्फ लैजान खोजिएको थियो। यद्यपि, गाँजा कहाँबाट ल्याइएको थियो र तस्करीमा को–को संलग्न थिए भन्ने विषयमा खुल्न बाँकी रहेको प्रहरीले जनाएको छ।

बरामद गाँजा र पिकअप भ्यानलाई थप अनुसन्धान तथा कानुनी कारबाहीका लागि नेपाल प्रहरीको जिम्मा लगाइएको एसपी भण्डारीले बताए। फरार चालकको खोजी भइरहेको प्रहरीले जनाएको छ।

तरकारीभित्र लुकाएर ठूलो परिमाणमा गाँजा ओसार्न खोजिएको यस घटनाले नेपाल–भारत सीमा क्षेत्रमा लागूऔषध तस्करी नियन्त्रणका लागि निगरानी र अनुसन्धानलाई थप प्रभावकारी बनाउनुपर्ने देखाएको छ।