एनपीएलमा अनलाइन सट्टेबाजी गरेको आरोपमा भारतीय नागरिक पक्राउ, ८९ लाखभन्दा बढीको कारोबार

बिरगंज, पर्सा, १८ कार्तिक 

काठमाडौं । नेपाल प्रिमियर लिग (एनपीएल) का खेलमा अनलाइनमार्फत सट्टेबाजी गरेको आरोपमा एक भारतीय नागरिक पक्राउ परेका छन्।

काठमाडौं उपत्यका अपराध अनुसन्धान कार्यालयको टोलीले भारतको बिहार राज्यअन्तर्गत भोजपुरका ३२ वर्षीय सोनु कुमार सिन्हालाई काठमाडौंको ठमेलबाट पक्राउ गरेको हो।

प्रहरीका अनुसार कीर्तिपुरस्थित त्रिभुवन विश्वविद्यालय क्रिकेट मैदानमा जारी एनपीएलका खेलमा अनलाइन सट्टेबाजी भइरहेको सूचनाका आधारमा अनुसन्धान अघि बढाइएको थियो। सोही क्रममा सिन्हालाई नियन्त्रणमा लिइएको प्रहरीले जनाएको छ।

उनको साथबाट बरामद गरिएका दुई थान मोबाइल फोन जाँच गर्दा विभिन्न चारवटा अनलाइन बेटिङ साइटमा लगइन गरी ८९ लाख ८१ हजार ७२९ रुपैयाँ बराबरको कारोबार गरेको प्रारम्भिक अनुसन्धानबाट खुलेको प्रहरीले जनाएको छ।

पक्राउ परेका सिन्हालाई मुलुकी अपराध संहिता, २०७४ को दफा १२५ अन्तर्गत जुवा खेल्ने वा सट्टेबाजी गर्न नहुने कसुरमा थप अनुसन्धान तथा कानुनी कारबाहीका लागि जिल्ला प्रहरी परिसर काठमाडौं पठाइएको प्रहरीले बुधबार जानकारी दिएको छ।

प्रहरीले घटनाबारे थप अनुसन्धान भइरहेको जनाएको छ।