२०० करोड भारतीय रुपैयाँ ठगी प्रकरणमा नोरा फतेहीलाई अदालतको समन, नोभेम्बर २ मा उपस्थित हुनुपर्ने

बिरगंज, पर्सा, १५ कार्तिक 

काठमाडौं। बलिउड अभिनेत्री तथा चर्चित डान्सर नोरा फतेहीलाई २०० करोड भारतीय रुपैयाँको ठगी तथा असुली प्रकरणमा दिल्लीस्थित अदालतले समन जारी गरेको छ।

भारतीय सञ्चारमाध्यमका अनुसार दिल्लीको राउज एभिन्यु अदालतले अभिनेत्री फतेहीलाई आगामी नोभेम्बर २ मा अदालतमा उपस्थित हुन निर्देशन दिएको हो। उक्त मुद्दामा उनलाई सरकारी पक्षको साक्षीका रूपमा बयान दिन बोलाइएको बताइएको छ।

यो प्रकरण कथित ठग सुकेश चन्द्रशेखरसँग सम्बन्धित छ। सुकेशमाथि जेलभित्रै बसेर आफूलाई भारत सरकारको उच्चपदस्थ अधिकारीका रूपमा परिचय दिँदै विभिन्न व्यक्तिलाई झुक्याएर रकम असुलेको आरोप छ।

अनुसन्धानअनुसार सुकेशले रेनबैक्सीका पूर्वप्रवर्द्धक शिविन्दर मोहन सिंहकी पत्नी अदिति सिंहबाट उनका श्रीमान्लाई जेलबाट छुटाइदिने आश्वासन दिएर करिब २०० करोड भारतीय रुपैयाँ असुलेको आरोप लागेको छ।

यस प्रकरणमा नोरा फतेहीको नाम महँगा उपहारसँग जोडिएको छ। अनुसन्धान निकायका अनुसार सुकेश वा उनीसँग सम्बन्धित व्यक्तिहरूले नोरालाई विलासी कार, महँगा ब्याग तथा गरगहनालगायतका सामग्री उपहार दिएका थिए।

यसअघि पनि प्रवर्तन निर्देशनालय (ईडी) र दिल्ली प्रहरीको आर्थिक अपराध शाखाले नोरासँग यस विषयमा सोधपुछ गरिसकेका छन्। सन् २०२० मा चेन्नईमा आयोजित एक कार्यक्रममा आफूले एक करोड भारतीय रुपैयाँभन्दा बढी मूल्यको विलासी कार उपहार पाएको नोराले बताएको विवरण सार्वजनिक भएको थियो।

यद्यपि, नोराले आफू कुनै पनि गैरकानुनी गतिविधिमा संलग्न नरहेको दाबी गर्दै आएकी छन्। उनले अनुसन्धानका क्रममा आफू पनि यस प्रकरणबाट पीडित भएको बताएकी थिइन्।

यसै प्रकरणमा बलिउड अभिनेत्री ज्याकलिन फर्नान्डिसको नाम पनि जोडिएको छ। सुकेशले उनीसँगको सम्बन्धका क्रममा करोडौँ रुपैयाँका विलासी सामग्री तथा अन्य उपहार दिएको आरोप अनुसन्धानमा उल्लेख छ। ज्याकलिनमाथि सम्पत्ति शुद्धीकरणसम्बन्धी अभियोगसमेत लगाइएको छ।

अनुसन्धानकर्ताहरूका अनुसार सन् २०२० देखि २०२१ सम्म दिल्लीको रोहिणी जेलमा रहेका बेला सुकेशले जेलभित्रैबाट ठगी तथा असुलीको सञ्जाल सञ्चालन गरेको आरोप छ।

अदालतले नोरालाई साक्षीका रूपमा उपस्थित हुन बोलाएको हो। समन जारी हुनु आफैँमा कुनै अपराधमा दोषी ठहर हुनु भने होइन। अब अदालतमा हुने बयानले यस प्रकरणको थप पक्ष स्पष्ट पार्ने अपेक्षा गरिएको छ।