‘सक्किगो नि, का बुढा क्या!’ अब किताबमै, कक्षा १ को पाठ्यपुस्तकमा अर्जुन घिमिरे ‘पाँडे’को फोटो

काठमाडौं । चर्चित हास्यकलाकार अर्जुन घिमिरे ‘पाँडे’ अब टेलिभिजन र चलचित्रमा मात्र सीमित रहेनन्, विद्यालयको पाठ्यपुस्तकमा समेत देखिन थालेका छन्। कक्षा १ का विद्यार्थीका लागि तयार गरिएको ‘हाम्रो सेरोफेरो’ विषयको पाठ्यपुस्तकमा उनको तस्वीर समावेश गरिएको छ।

अर्जुन घिमिरेले सामाजिक सञ्जालमार्फत कक्षा १ को उक्त पाठ्यपुस्तकको तस्वीर सार्वजनिक गर्दै खुसी व्यक्त गरेका छन्। पुस्तकको अभ्यास खण्डमा विभिन्न चर्चित कलाकारका तस्वीर राखेर विद्यार्थीलाई उनीहरूको पहिचान गरी नाम लेख्न भनिएको छ।

अभ्यासमा मदनकृष्ण श्रेष्ठ, दीपाश्री निरौला, बसुन्धरा भुसाल, हरिवंश आचार्य, अर्जुन घिमिरे ‘पाँडे’ र राजेश हमालका तस्वीर समावेश छन्।

‘हिजो आजका कुरा’ हुँदै ‘भद्रगोल’मा ‘पाँडे’ पात्रमार्फत लोकप्रिय बनेका अर्जुन घिमिरे पछिल्लो समय चलचित्रमा समेत सक्रिय छन्। उनको चर्चित संवाद ‘सक्किगो नि, का बुढा क्या!’ नेपाली दर्शकमाझ निकै लोकप्रिय छ।

टेलिभिजनका हास्य कार्यक्रम हुँदै चलचित्रसम्म आफ्नो छुट्टै पहिचान बनाउन सफल घिमिरेको तस्वीर विद्यालयको पाठ्यपुस्तकमै समावेश भएपछि सामाजिक सञ्जालमा उनलाई बधाई तथा शुभकामना दिने क्रम बढेको छ।

कक्षाको किताबमा आफ्नो तस्वीर देखिनु कलाकारका लागि मात्र नभई उनको लामो कलायात्राको सम्मानका रूपमा समेत हेरिएको छ। बालबालिकाले सानै उमेरमा नेपाली कला क्षेत्रका परिचित कलाकारबारे चिन्ने अवसर पाउने भएकाले पाठ्यपुस्तकमा कलाकारहरूको समावेशलाई सकारात्मक रूपमा लिइएको छ।