बहुला कुकुरले गाईलाई टोक्दा गाउँमा त्रास: चरणामृत खाएका ४५० जनाले लगाए खोप

रौतहट ६ कार्तिक।

भारतको उत्तर प्रदेशस्थित गोरखपुरको डाडी खास गाउँमा एउटा गाईको मृत्यु भएपछि गाउँलेहरूमा त्रास फैलिएको छ। आवारा कुकुरले टोकेपछि संक्रमित भएको आशंका गरिएको उक्त गाईले मृत्युअघि कुकुरले जस्तै भुक्न थालेको बताइएको छ। सोही गाईको दूधबाट बनेको चरणामृत दुर्गा पूजाका क्रममा सयौँ श्रद्धालुलाई वितरण गरिएको थियो।

गाईको मृत्यु र त्यसमा रेबिजका लक्षण देखिएको आशंकासम्बन्धी खबर फैलिएपछि दुई गाउँका बासिन्दामा त्रास फैलिएको हो। सम्भावित जोखिमको डरले करिब ४५० जना ग्रामीण स्वास्थ्य केन्द्र तथा मेडिकल क्याम्पमा पुगेर हतारहतार एन्टिरेबिज खोप लगाएका छन्।

घटनापछि स्वास्थ्य विभागले गाउँमै स्वास्थ्य शिविर सञ्चालन गरी चिन्तित स्थानीयको खोप लगाउने व्यवस्था गरेको थियो।

यस विषयमा उपमुख्य चिकित्सा अधिकारी डा. राजेश कुमारले भने, “मानिसहरूले आत्तिनुपर्ने आवश्यकता छैन। दूध उमाल्दा भाइरस निष्क्रिय हुन्छन्।”

उनका अनुसार सम्भावित जोखिमलाई ध्यानमा राख्दै स्वास्थ्य विभागको टोलीले गाउँमा शिविर सञ्चालन गरेर खोप लगाउने काम पूरा गरेको छ।

गाईको दूधबाट बनेको चरणामृत सेवन गरेका श्रद्धालुमा रेबिज संक्रमणको जोखिमबारे फैलिएको आशंकाले गाउँमा त्रासको वातावरण सिर्जना गरेको छ।