बिरगंजमा बजार अनुगमन कडाइ: सरसफाइ र मापदण्ड उल्लंघन गर्ने ४ पसललाई २५ हजार जरिवाना

वीरगञ्जको मुख्य बजार क्षेत्रमा आज गरिएको अनुगमनमा सरसफाइ, मूल्यसूची तथा कानुनी कागजातमा लापरबाही गर्ने व्यवसायीमाथि कारबाही गरिएको छ। वाणिज्य कार्यालय वीरगञ्जको संयुक्त अनुगमन टोलीले गीता मन्दिर रोड आसपासका विभिन्न होटल तथा रेष्टुरेन्टहरूमा निरीक्षण गर्दै ४ वटा व्यवसायलाई कुल रु. २५ हजार जरिवाना गरेको हो।

अनुगमनका क्रममा फुड गार्डेन, लक्ष्मी सेकुवा होटल, नेवा सेकुवा पसः र सोखिन म:म सेन्टर लगायतका व्यवसायमा खाद्य स्वच्छता, सरसफाइ, मूल्यसूची तथा सञ्चालन मापदण्डको अवस्थाबारे सूक्ष्म रूपमा जाँच गरिएको थियो। टोलीले विशेष गरी भान्सा क्षेत्रको सफाइ, खाद्य सामग्री भण्डारणको तरिका, प्रयोग हुने पानीको गुणस्तर तथा कर्मचारीहरूको व्यक्तिगत सरसफाइमा ध्यान केन्द्रित गरेको जनाएको छ।

निरीक्षणका क्रममा केही स्थानमा आवश्यक मापदण्ड पूरा नगरेको, मूल्यसूची नराखिएको तथा आवश्यक कागजात अद्यावधिक नभएको पाइएपछि तत्काल सुधार गर्न निर्देशन दिँदै कारबाही गरिएको हो। उपभोक्ताको स्वास्थ्यमा प्रत्यक्ष असर पार्ने यस्ता कमजोरीलाई गम्भीर रूपमा लिँदै आगामी दिनमा पनि कडा निगरानी जारी रहने अनुगमन टोलीले स्पष्ट पारेको छ।

टोलीले व्यवसायीहरूलाई स्वच्छता र गुणस्तरमा कुनै सम्झौता नगर्न आग्रह गर्दै उपभोक्तालाई सुरक्षित र स्वस्थ्य खाद्य सेवा उपलब्ध गराउन सचेत गराएको छ। मापदण्ड पालना नगरेमा थप कडा कारबाही गरिने चेतावनी समेत दिइएको छ।

उक्त अनुगमन टोलीमा वाणिज्य, आपूर्ति तथा उपभोक्ता संरक्षण कार्यालय वीरगञ्जका मधुलेश प्रसाद साह, खाद्य प्रविधि तथा गुण नियन्त्रण कार्यालयका श्रवण कुमार साह, जिल्ला प्रशासन कार्यालयका ब्रह्मदेव यादव, उपभोक्ता हित संरक्षण मञ्चका अजित भुजेल, वीरगञ्ज उद्योग वाणिज्य संघका मनोज कुमार दास, जिल्ला प्रहरी कार्यालय पर्साका प्रहरी सहायक निरीक्षक रामबाबू प्रसाद यादव तथा सञ्चारकर्मी अभिलाष गुप्ता लगायतको सहभागिता रहेको थियो।

अनुगमन टोलीले यस्ता बजार अनुगमन कार्यक्रमलाई आगामी दिनमा पनि निरन्तरता दिइने जनाएको छ।