एकै दिन २ हजारभन्दा बढी चालक कारबाहीमा

काठमाडौँ,२० वैशाख । काठमाडौँ उपत्यकामा ट्राफिक नियम उल्लङ्घन गर्ने चालकहरूमाथि गरिएको कारबाहीबाट पछिल्लो २४ घण्टामा पाँच लाख ६५ हजार रुपैयाँ राजस्व सङ्कलन भएको छ।

काठमाडौँ उपत्यका ट्राफिक प्रहरी कार्यालयका अनुसार विभिन्न ट्राफिक नियम उल्लङ्घन गरेको आरोपमा दुई हजार १११ चालकलाई कारबाही गरिएको हो।कारबाहीमा परेकामध्ये १०९ जना मादक पदार्थ सेवन गरेर सवारी चलाउने चालक रहेका छन् भने नियमविपरीत ‘राइड सेयरिङ’ गर्ने १८४ जनालाई पनि कारबाही गरिएको प्रहरीले जनाएको छ।

त्यस्तै, ट्राफिक सङ्केत उल्लङ्घन गर्ने १०३, तीव्र गतिमा सवारी चलाउने २२२, लेन अनुशासन नमानेका १३८ तथा निषेधित क्षेत्रमा हर्न बजाउने ६७ चालक कारबाहीमा परेका छन्।

सडक पेटीमा सवारी पार्किङ गर्ने ८६, तोकिएको स्थानबाहेक यात्रु चढाउने–ओराल्ने ४२ र अन्य विभिन्न नियम उल्लङ्घन गर्ने एक हजार १६० जनालाई समेत ट्राफिक प्रहरीले जरिवाना गरेको जनाएको छ।

ट्राफिक प्रहरीले सडक सुरक्षा र अनुशासन कायम गर्न नियमित निगरानी तथा कारबाहीलाई अझ कडाइका साथ अघि बढाइने जनाएको छ।