गोरखाका ५ स्थानीय तहलाई प्रेमकुमार खत्रीको सहयोग: ६ एम्बुलेन्ससहित स्वास्थ्य सामग्री हस्तान्तरण

गोरखा — नेपाली कांग्रेसका नेता तथा पर्यटन व्यवसायी प्रेमकुमार खत्रीले गोरखाका ५ वटा स्थानीय तहलाई ६ वटा एम्बुलेन्ससहित विभिन्न स्वास्थ्य सामग्री सहयोग गरेका छन्।
आज गोरखा नगरपालिकाको कार्यालयमा आयोजित एक कार्यक्रममार्फत खत्रीले उक्त एम्बुलेन्स र स्वास्थ्य सामग्री हस्तान्तरण गरेका हुन्। खत्रीले खरिद गरी उपलब्ध गराएका एम्बुलेन्सको साँचो तथा स्वास्थ्य सामग्री नेपाली कांग्रेसका केन्द्रीय सदस्य सुरेन्द्रराज पाण्डेले सम्बन्धित स्थानीय तहका प्रमुख तथा उपप्रमुखहरूलाई हस्तान्तरण गरेका थिए।
गोरखा स्थायी घर भएका खत्रीले ‘सम्भव नेपाल’ मार्फत गोरखा नगरपालिकालाई २ वटा एम्बुलेन्स, शहिद लखन गाउँपालिकालाई १, भीमसेन थापा गाउँपालिकालाई १, गण्डकी गाउँपालिकालाई १ र धार्चे गाउँपालिकालाई १ वटा एम्बुलेन्स उपलब्ध गराएका हुन्।

यसका साथै खत्रीले ६ थान अक्सिजन सिलिन्डर, ६ सय थान एन्टिजेन किट, १ हजार २ सय थान VTM, ८ सय लिटर सेनिटाइजर, ५६ हजार सर्जिकल मास्क, १ सय थान अक्सिमिटर र PPE सेटलगायतका अत्यावश्यक स्वास्थ्य सामग्री पनि सहयोग गरेका छन्।
शहिद लखन गाउँपालिका–७ का वडाध्यक्ष शरण श्रेष्ठका अनुसार खत्रीले यसअघि पनि गोरखाका लागि करिब ४० लाख रुपैयाँ बराबरको स्वास्थ्य सामग्री सहयोग गरिसकेका छन्।
स्थानीय तहका जनप्रतिनिधिहरूले खत्रीको सहयोगले ग्रामीण क्षेत्रमा स्वास्थ्य सेवा प्रवाहलाई थप सहज बनाउने विश्वास व्यक्त गरेका छन्।