गृहमन्त्री गुरुङको बचाउ: “भ्रष्टाचार नगरी कमाउनु पाप होइन”

३० चैत, काठमाडौं । बालेन शाह नेतृत्वको मन्त्रिपरिषद्का सदस्यहरूको सम्पत्ति विवरण सार्वजनिक भएसँगै सुरु भएको चौतर्फी आलोचनाका बीच गृहमन्त्री सुधन गुरुङले सामाजिक सञ्जालमार्फत आक्रामक स्पष्टीकरण दिएका छन् ।

मन्त्रीहरूको विलासी जीवनशैली र करोडौँको सेयर पोर्टफोलियोमाथि प्रश्न उठेपछि सोमबार इन्स्टाग्राममा आफ्नो धारणा राख्दै मन्त्री गुरुङले सत्ताको बागडोर सम्हाल्नुअघि मेहनत गरेर सम्पत्ति आर्जन गर्नु कुनै ‘पाप’ नभएको तर्क गरेका हुन् ।

उनले भ्रष्टाचार नगरी कमाइएको सम्पत्तिलाई नकारात्मक नजरले हेर्नु गलत भएको टिप्पणी गर्दै सरकारमा आएपछि पदको दुरुपयोग गरेर कमाउनुलाई मात्र वास्तविक पापको संज्ञा दिएका छन् ।

विरोधीहरूका टीकाटिप्पणीलाई कडा जवाफ दिने क्रममा मन्त्री गुरुङले ‘चेतना भया’ भन्दै एउटा चर्चित भनाइलाई सापटी लिएर गम्भीर कटाक्ष समेत गरेका छन् । उनले लेखेका छन्, ‘तिमी जन्मँदै गरिब जन्मनु त्यो तिम्रो गल्ती होइन, तर तिमी मर्दा गरिब मर्नु चाहिँ तिम्रै गल्ती हो ।’

मन्त्रीहरूको सम्पत्ति विवरणमा ४ करोड ३१ लाखको सेयर र ८९ तोला सुन देखिएका गुरुङले आफ्नो कमाइलाई व्यक्तिगत पुरुषार्थ र मिहिनेतको नतिजाका रूपमा अर्थ्याउन खोजेका छन् ।

जेनजी आन्दोलनको बलमा भ्रष्टाचार विरुद्धको नारासहित सत्तामा पुगेको रास्वपा सरकारका मन्त्रीहरू र उनीहरूको सम्पत्ति अहिले आम जनता र विपक्षीको कडा निगरानीमा परिरहँदा गृहमन्त्रीको यो टिप्पणीले राजनीतिक वृत्तमा थप चर्चा र विवाद निम्त्याएको छ ।