इरानमा दुई ‘इजरायली जासुस’ लाई मृत्युदण्ड, सूचना बाह्य शक्तिलाई दिएको ठहर

७ बैशाख, काठमाडौं । इरानले आफ्नो मुलुकको सुरक्षा संवेदनशीलतामाथि खलल पुर्‍याएको र विदेशी शक्तिलाई सूचना बेचेको गम्भीर आरोपमा दुई जनालाई फाँसी दिएको छ ।

अलजजिरा र स्थानीय तस्निम समाचार एजेन्सीका अनुसार, मृत्युदण्ड पाउनेहरू इजरायली गुप्तचर संस्था ‘मोसाद’ सँग आबद्ध सञ्जालका सदस्यहरू रहेका थिए । उनीहरूले इरानका महत्वपूर्ण संरचना र संवेदनशील स्थानहरूको गोप्य सूचना संकलन गरी बाह्य शक्तिलाई बुझाउने गरेको र देशमा अस्थिरता फैलाउने गतिविधिमा संलग्न रहेको इरानी न्यायिक निकायको दाबी छ ।

अदालतको ठहर अनुसार, ती व्यक्तिहरूले विस्फोटक प्रक्षेप्य (प्रोजेक्टाइल) निर्माण गर्ने र सुरक्षित सञ्चार माध्यम प्रयोग गरी गुप्त सूचना आदानप्रदान गर्ने विशेष तालिम समेत प्राप्त गरेका थिए । लामो समयदेखि चलिरहेको कानुनी प्रक्रियापछि उनीहरूलाई संवेदनशील संरचनामा क्षति पुर्‍याउने प्रयास र जासुसीको अभियोगमा दोषी ठहर गर्दै आज बिहान मृत्युदण्ड दिइएको हो ।

यो कदमसँगै इरानले आफ्नो आन्तरिक सुरक्षामा चुनौती दिने र बाह्य शक्तिसँग मिलेर तोडफोडमा उत्रिनेहरूलाई कुनै पनि हालतमा नछाड्ने कडा सन्देश दिन खोजेको देखिएको छ ।