नर्सिङ होमको ‘लोकेसन म्याप’ देखि क्लिनिकमा मृत्युसम्म: के थियो गीता पाण्डे प्रकरणको रहस्य ?

९ बैशाख, काठमाडौं ।  बुटवलमा गर्भपतनका क्रममा भएको महिलाको मृत्यु प्रकरणमा जोडिएका दुई चिकित्सकसहित पाँच जनालाई प्रहरीले नियन्त्रणमा लिएको छ ।

पाल्पाको बगनासकाली–२ ख्याहाकी २९ वर्षीया गीता पाण्डेको मृत्यु भएपछि उनका श्रीमान् प्रकाश पाण्डेले दिएको किटानी जाहेरीका आधारमा प्रहरीले अनुसन्धान प्रक्रिया अघि बढाएको हो ।

यस घटनामा खत्री नर्सिङ होमका सञ्चालक डा. डीबी खत्री र इन्दु लेखा स्वास्थ्य क्लिनिकका चिकित्सक डा.सतिष रुपाखेती मंगलबार साँझ आफैँ प्रहरी कार्यालयमा उपस्थित भएपछि नियन्त्रणमा लिइएका हुन् ।

घटनाको विवरण अनुसार, चैत २७ गते गर्भ जाँचका लागि खत्री नर्सिङ होम पुगेकी गीतालाई डा.खत्रीले गर्भ असामान्य रहेको भन्दै थप उपचारका लागि वैशाख ४ मा बोलाएका थिए । तर, वैशाख ५ मा नर्सिङ होम पुग्दा उनलाई ‘लोकेसन म्याप’ दिएर बुटवलस्थित जोनल फार्मेसी क्लिनिक पठाइएको थियो। फार्मेसीले १६ हजार रुपैयाँ शुल्क तोकेर औषधि दिएपछि उनलाई पुनः इन्दु लेखा क्लिनिक पुर्‍याइएको थियो ।

सोही क्लिनिकमा डा. रुपाखेतीले जाँच र गर्भपतन गराउने क्रममा गीताको अवस्था जटिल बनेको र अस्पताल लैजाँदै गर्दा उनको मृत्यु भएको पीडित पक्षको दाबी छ ।

मृतकका पति प्रकाश पाण्डेले चिकित्सकहरूले केवल आर्थिक लाभको उद्देश्य राखेर उपचारमा गम्भीर लापरवाही गरेको आरोप लगाएका छन् । उनले स्वस्थ रहेकी श्रीमतीलाई बेहोस भएपछि आफूलाई जानकारी नै नदिई लुम्बिनी सिटी अस्पताल पुर्‍याइएको र उपचारका रिपोर्टहरू समेत लुकाउन खोजिएको बताएका छन् ।

यसै प्रकरणमा प्रहरीले जोनल फार्मेसीकी सन्ध्या बस्नेत, निलम घर्ती मगर र इन्दु लेखा क्लिनिकका सञ्चालक खगेन्द्रप्रसाद पाण्डेलाई पनि पक्राउ गरिसकेको छ । इलाका प्रहरी कार्यालय बुटवलका अनुसार पक्राउ परेकाहरूमाथि अदालतबाट म्याद थप गरी घटनाको निष्पक्ष छानबिन भइरहेको छ ।