परवानीपुरमा बिबादित बनेका घुमुवा अहीले गण्डक चौकिमा कार्यरत, सम्बन्धित निकाय मौन कारवाही कसले गर्ने

प्रहरी चौकी गण्डकका इन्चार्ज मनिष सिंहले घुमुवा प्रहरी परिचालन गरी विभिन्न अवैध कारोबारी तथा यातायात व्यवसायीहरूबाट नियमित रूपमा रकम असुली गरिरहेको आरोप लागेको हो। यस कार्यमा प्रहरी हवलदार प्रेम यादवको मुख्य भूमिका रहेको स्थानीय स्रोतहरूले बताएका छन्।

स्रोतका अनुसार वीरगंज तथा कलैयाबाट सञ्चालन हुने रात्री बस, माइक्रोबस तथा ट्रान्सपोर्टका सवारी साधनहरूबाट मासिक रूपमा ठूलो रकम संकलन गर्ने गरिएको छ। विशेषगरी विभिन्न ट्रान्सपोर्ट कम्पनीमार्फत अन्य जिल्लातर्फ पठाइने गाडीहरूमा अवैध सामग्री ओसारपसार हुने गरेको र ती गाडीहरूलाई कारवाही गर्नुको सट्टा प्रहरीसँग “सेटिङ” मिलाएर सहज रूपमा आवतजावत गर्न दिइने गरेको आरोप छ। प्रहरी हवलदार प्रेम यादवले ती सवारी साधनका चालक तथा व्यवसायीहरूसँग मासिक रकम बुझ्ने सहमति गरेर काम गरिरहेको दाबी गरिएको छ।

स्थानीय स्रोतहरूले जनाएअनुसार वीरगंज क्षेत्रबाट दैनिक दर्जनौं गाडीहरू अवैध सामग्री बोकेर गण्डक नाका हुँदै अन्य जिल्लातर्फ जाने गर्दछन्। ती गाडीहरूमा शंकास्पद सामग्री रहेको सूचना प्रहरीलाई भए पनि नियमित चेकजाँच र कानुनी कारवाही भने नगर्ने गरिएको आरोप छ। बरु, सम्बन्धित पक्षसँग आर्थिक लेनदेन गरी सहज रूपमा छुट दिने गरिएको बताइन्छ।

त्यसैगरी, वीरगंजबाट चल्ने रात्री बस तथा माइक्रोबसमार्फत पोके तस्करी पनि व्यापक रूपमा हुने गरेको दाबी गरिएको छ। स्रोतका अनुसार केही महिला तस्करहरूलाई प्रति “पोका” निश्चित रकमका आधारमा छुट दिने गरिएको छ। एक पोके तस्करले नाम नछाप्ने शर्तमा बताएअनुसार, यदि ड्युटीमा रहेका प्रहरीले सोधपुछ गरेमा “यो सामान प्रेम सरसँग मिलाइएको हो” भन्नेबित्तिकै कुनै अवरोध बिना जान दिइने गरेको छ। यसले प्रहरी चौकीभित्रैबाट अवैध गतिविधिलाई संरक्षण भइरहेको आशंका बढाएको स्थानीयहरूको भनाइ छ।

प्रहरी हवलदार प्रेम यादवको दरबन्दी मकवानपुर जिल्लामा रहे पनि उनी लामो समयदेखि वीरगंज क्षेत्रमा घुमुवाको रूपमा कार्यरत रहेको बताइएको छ। यसअघि पनि उनी परवानीपुर प्रहरी चौकीमा घुमुवा प्रहरीको रूपमा बसेको र सीमावर्ती क्षेत्रमा हुने तस्करी तथा अवैध कारोबारबारे राम्रो जानकारी राख्ने व्यक्तिका रूपमा चिनिने गरिएको स्रोतको दाबी छ। यही कारणले उनलाई गण्डक चौकीका इन्चार्ज मनिष सिंहले आफूसँगै राखी रकम असुलीको जिम्मेवारी दिएको आरोप लगाइएको छ।