पश्चिम बङ्गालमा शुभेन्दु अधिकारी मुख्यमन्त्री, ४६ वर्षपछि भाजपाको सरकार

अधिकारीसँगै पाँच जना मन्त्रीले पनि शपथ लिएका छन्।

भारतीय जनता पार्टी ले पश्चिम बङ्गालमा स्थापना भएको ४६ वर्षपछि पहिलो पटक सरकार गठन गरेको हो। यसअघि तृणमूल कंग्रेस ले वामपन्थी दलको सत्ता समाप्त गर्दै लगातार १५ वर्ष शासन गरेको थियो।

२ सय ९४ सदस्यीय पश्चिम बङ्गाल विधानसभामा यसपटक भाजपाले २ सय ७ सिट जित्दै दुईतिहाइ बहुमतसहित सरकार बनाएको छ। तृणमूल कंग्रेसले भने ८० सिटमा सीमित हुनुपरेको छ।

निर्वाचन परिणामपछि पूर्व मुख्यमन्त्री ममता बनर्जी ले चुनावमा धाँधली भएको आरोप लगाउँदै राजीनामा दिन अस्वीकार गरेपछि राज्यपालले विधानसभा भंग गरेर नयाँ सरकार गठनको प्रक्रिया अघि बढाएको बताइएको छ।

यसअघि ममता बनर्जीका निकट सहयोगी रहेका शुभेन्दु अधिकारी सन् २०२१ मा भाजपा प्रवेश गरेका थिए। यसपटक निर्वाचनमा ममता बनर्जीलाई नै पराजित गरेपछि उनको राजनीतिक प्रभाव अझ मजबुत बनेको विश्लेषण गरिएको छ।

मुख्यमन्त्री नियुक्तिपछि आयोजित शपथ ग्रहण समारोहमा भारतीय प्रधानमन्त्री नरेन्द्र मोदी पनि सहभागी भएका थिए। त्यसअघि गृहमन्त्री अमित शाह को उपस्थितिमा बसेको भाजपा विधायक दलको बैठकले अधिकारीलाई दलको नेता चयन गरेको थियो।