पूर्णबहादुर खड्काद्वारा निवर्तमान पदाधिकारी र केन्द्रीय सदस्यहरूको बैठक आह्वान

५ वैशाख,काठमाडौं । पूर्णबहादुर खड्का ले नेपाली कांग्रेस को १४औँ महाधिवेशनबाट निर्वाचित निवर्तमान पदाधिकारी र केन्द्रीय सदस्यहरूको बैठक बोलाएका छन्। सर्वोच्च अदालतमा दायर गरिएको रिट खारेज भएपछि आगामी रणनीतिबारे परामर्श गर्न उनले बैठक आह्वान गरेका हुन्।

खड्काले शनिबार दिउँसो साढे ३ बजे गोल्फुटारस्थित आफ्नै निवासमा बैठक बस्ने गरी आह्वान गरेको सचिवालयले जनाएको छ। अदालतको निर्णयपछि उनी बिहानैदेखि निकटस्थ नेताहरूसँग आन्तरिक छलफलमा जुटेका थिए।

छलफलका क्रममा इन्द्रबहादुर बानियाँ र केदार कार्की लगायतका नेताहरू खड्का निवास पुगेका थिए। यस्तै, केन्द्रीय सदस्यहरू मीन विश्वकर्मा, गुरुराज बराल, नैनसिंह महर, कुन्दनराज काफ्ले र उर्मिला थपलियाल सँग पनि परामर्श गरिएको स्रोतले जनाएको छ।

स्रोतका अनुसार अदालतको निर्णयपछि खड्काले आफ्नो आगामी कदमबारे निकटस्थहरूसँग छलफल गरी औपचारिक धारणा वक्तव्यमार्फत् सार्वजनिक गर्ने तयारी गरेका छन्। उनको आधिकारिक प्रतिक्रिया आइतबारसम्म आउने अपेक्षा गरिएको छ।