सरकारले नागरिकका माग सुनेन भने आवाज ठूलो बनाउन जान्दछौँः गगन थापा

९ बैशाख, काठमाडौं । नेपाली कांग्रेसका सभापति गगन थापाले सरकारले जनसरोकारका मागहरूलाई बेवास्ता गरे सशक्त रूपमा प्रस्तुत हुने चेतावनी दिएका छन् ।

बुधबार विराटनगर विमानस्थलमा सञ्चारकर्मीहरूसँग कुरा गर्दै थापाले सरकारले कतिपय निर्णयहरू कानुन मिचेर ‘लहडका भरमा’ गरिरहेको आरोप लगाए । उनले विशेष गरी भदौ २४ गतेको आन्दोलनका क्रममा भएका घटनाहरूको निष्पक्ष र न्यायिक छानबिन गर्न सरकारसँग जोडदार माग गरेका छन् ।

सभापति थापाले नागरिकमाथि अनुसन्धान गर्ने सरकारको अधिकारलाई कांग्रेसले सम्मान गर्ने भए पनि अनुसन्धानका नाममा राज्यका निकायहरूले विधि र विधानको पालना गर्नुपर्ने बताए । ‘हामीले भदौ २४ को घटनाबारे सरकारको ध्यानाकर्षण गराएका छौँ,’ थापाले भने, ‘यदि सरकारले हाम्रा मागहरू पूरा गरेन भने ती माग कसरी पूरा गराउने र आवाजलाई कसरी ठूलो बनाउने भन्ने हामीलाई राम्रोसँग थाहा छ।’ पछिल्लो समय सरकारले आफ्ना मनमा लागेका कुरा गर्न कानुन मिच्ने काम गरेको भन्दै उनले सरकारलाई सचेत गराए ।

पार्टीको भूमिकाबारे प्रस्ट पार्दै थापाले कांग्रेस सङ्घीय संसदमा जिम्मेवार प्रतिपक्षको भूमिकामा रहे पनि सातै प्रदेशमा सरकारमा रहेको स्मरण गराए। कांग्रेस अराजक नभई तथ्यमा आधारित भएर प्रस्तुत हुने भएकाले कतिपयलाई आवाज मधुरो लागेको हुन सक्ने उनको भनाइ थियो ।

उनले जनहितका विषयमा सरकार चुकेको खण्डमा कांग्रेस दरो भएर उभिने प्रतिबद्धता व्यक्त गरे । १५औँ महाधिवेशनमा पार्टीलाई एक ढिक्का बनाएर लैजाने बताउँदै उनले गृहमन्त्री सुधन गुरुङका विषयमा पार्टीले आधिकारिक धारणा सार्वजनिक गरिसकेको उल्लेख गरे ।