सर्वोच्चको फैसलाको पूर्णपाठ सार्वजनिक : खुल्यो वीरगञ्जको सडक २५/२५ मिटर विस्तार गर्ने बाटो

वीरगञ्ज । सर्वोच्च अदालतले त्रिभुवन राजपथ (काठमाडौँ–पथलैया–वीरगञ्ज भन्सार) अन्तर्गत वीरगञ्ज क्षेत्रको सडक विस्तार सम्बन्धी रिट निवेदन पूर्ण रूपमा खारेज गरेको फैसलाको पूर्ण पाठ सार्वजनिक भएको छ ।

सर्वोच्चको फैसलासँगै सडक विभागलाई विस्तार कार्य अगाडि बढाउन बाटो खुलेको छ । अदालतले मुख्य सडकका जग्गाधनीहरूको सम्पत्ति हक र क्षतिपूर्ति मागलाई अस्वीकार गर्दै लामो समयदेखि विवादित रहेको सडक विस्तारको मुद्दालाई निकास दिएको छ ।

गत वर्ष फागुन २८ गते न्यायाधीशद्वय विनोद शर्मा र महेश शर्मा पौडेलको संयुक्त इजलासले सुनाएको फैसलाको पूर्ण पाठ आइतबार मात्र सार्वजनिक भएको हो । फैसलाले सडक विस्तारलाई कानुनसम्मत ठहराउँदै स्थानीय निवासीहरूको दाबीलाई खारेज गरेको छ ।