तस्करी नियन्त्रण गर्न पुगेका सशस्त्र प्रहरीमाथि आक्रमण, केही घाइते

 वीरगन्ज । पर्साको वीरगन्ज महानगरपालिका–१० आदर्शनगरस्थित एक ट्रान्सपोर्ट गोदाममा छापा मार्न पुगेको सशस्त्र प्रहरीको टोलीमाथि व्यापारीहरूले आक्रमण गरेका छन्। घटनामा एक जना सशस्त्र प्रहरी घाइते भएका छन् भने प्रहरीको गाडीमा समेत क्षति पुगेको छ।

सोमबार बिहान सशस्त्र प्रहरी नायब उपरीक्षक (डीएसपी) विकास अधिकारीको नेतृत्वमा सशस्त्र प्रहरीको टोली आदर्शनगरस्थित एक घरमा रहेको सबिता ट्रेडर्स नामक गोदाममा छापा मार्न पुगेको थियो। उक्त गोदाम विनोद साह (कानु) ले सञ्चालन गर्दै आएको बताइएको छ।

सशस्त्र प्रहरीका अनुसार राजश्व छली गरेर भित्र्याइएको सामान गोदाममा भण्डारण गरिएको भन्ने सूचनाका आधारमा दुई वटा गाडीमा प्रहरी टोली त्यहाँ पुगेको थियो। गोदाममा खानतलासी गर्ने प्रक्रिया सुरु गर्न खोज्दा त्यहाँ उपस्थित व्यापारीहरूले विरोध जनाएका थिए।

प्रहरीले गोदामको ढोकाको ताल्चा फुटाउन खोजेपछि विवाद चर्किएको थियो। त्यसक्रममा व्यापारीहरूको एक समूहले प्रहरीमाथि आक्रमण गरेको बताइएको छ। आक्रमणका क्रममा ढुंगा प्रहार हुँदा एक जना सशस्त्र प्रहरी घाइते भएका छन् भने प्रहरीको गाडीको शीशा फुटेको छ। अवस्था तनावग्रस्त बनेपछि सशस्त्र प्रहरी टोली त्यहाँबाट फर्किएको थियो।

सशस्त्र प्रहरी नायब उपरीक्षक विकास अधिकारीले गोदामको खानतलासी गर्ने क्रममा केही समूहबाट आक्रमण भएको पुष्टि गर्दै घाइते सुरक्षाकर्मीको उपचार भइरहेको जानकारी दिए। उनले गोदामबाट केही सामान नियन्त्रणमा लिइएको र त्यसको विवरण संकलन गर्ने काम भइरहेको पनि बताए। गोदाम सञ्चालक र घटनाबारे थप अनुसन्धान भइरहेको प्रहरीले जनाएको छ।

यता आदर्शनगरका ट्रान्सपोर्ट व्यवसायीहरूले भने सशस्त्र प्रहरीले अनावश्यक दुःख दिने नियतले पटक–पटक गोदाममा छापा मार्ने गरेको आरोप लगाएका छन्। एक व्यापारीका अनुसार बिलबिजक हुँदाहुँदै पनि सशस्त्र प्रहरीले सामान उठाएर लैजाने र पछि राजश्व अनुसन्धान कार्यालयमा प्रमाण दिएपछि मात्रै सामान फिर्ता हुने गरेको गुनासो गरेका छन्।

व्यापारीहरूले यदि छापा वा खानतलासी लिनुपर्ने भए कानुनी प्रक्रिया पूरा गरेर सम्बन्धित निकायमार्फत गर्नुपर्ने बताएका छन्। गोदाममा खानतलासी गर्ने अधिकार राजश्व अनुसन्धान कार्यालयसँग मात्रै रहेको दाबी गर्दै सशस्त्र प्रहरीको यस्तो कार्यशैलीप्रति असन्तुष्टि व्यक्त गरेका छन्।

घटनापछि उक्त क्षेत्रमा केही समय तनावको अवस्था रहे पनि अहिले स्थिति सामान्य बन्दै गएको स्थानीय स्रोतले जनाएको छ। प्रहरीले घटनाबारे थप अनुसन्धान गरिरहेको छ।