शेखर गोल्छालाई २४ घण्टाभित्र अदालतमा उपस्थित गराउन सर्वोच्चको आदेश

काठमाडौँ,१५ वैशाख । शेखर गोल्छालाई हिरासतमा राखिएको विषयमा परेको बन्दी प्रत्यक्षीकरण रिटमा सर्वोच्च अदालतले २४ घण्टाभित्र उपस्थित गराउन आदेश दिएको छ।

मंगलबार श्री नृपध्वज निरौलाको एकल इजलासले विपक्षीहरूका नाममा गोल्छालाई बन्दीसहित अदालतमा उपस्थित गराई लिखित जवाफ पेस गर्न निर्देशन दिएको हो।

गोल्छाकी पत्नी सीमा गोल्छाले दायर गरेको रिटमाथि सुनुवाइ गर्दै अदालतले उक्त आदेश जारी गरेको हो।

यसअघि (सीआईबी) ले गोल्छालाई वैशाख १० गते नियन्त्रणमा लिएर अनुसन्धान गरिरहेको थियो। काठमाडौँ जिल्ला अदालतले पनि सोमबार थप तीन दिन हिरासतमा राख्न अनुमति दिएको थियो, जुन आदेश न्यायाधीश दण्डपाणि लामिछानेको इजलासबाट जारी भएको थियो।

अब सर्वोच्चको आदेशअनुसार गोल्छालाई २४ घण्टाभित्र अदालतसमक्ष उपस्थित गराउनुपर्ने भएको छ।