सिंहदरबारमा नेपाल–अमेरिका संवाद: आर्थिक साझेदारी र लगानी विस्तारमा जोड

८ बैशाख, काठमाडौँ । नेपालको तीन दिने औपचारिक भ्रमणमा रहेका अमेरिकी दक्षिण तथा मध्य एसियाली मामिला हेर्ने सहायक विदेशमन्त्री एस। पाउल कपुर र परराष्ट्रमन्त्री शिशिर खनालबिच सिंहदरबारमा उच्चस्तरीय भेटवार्ता भएको छ ।

परराष्ट्र मन्त्रालयमा सोमबार भएको उक्त शिष्टाचार भेटमा नेपाल र अमेरिकाबिचको सात दशक लामो कूटनीतिक सम्बन्धलाई थप सुदृढ बनाउँदै आपसी हितका विविध आयामहरूमा केन्द्रित रहेर गहन छलफल भएको छ। भेटवार्तापछि मन्त्रालयका प्रवक्ता लोकबहादुर क्षेत्रीले दुई देशबिचको मैत्रीपूर्ण सम्बन्धलाई नयाँ उचाइमा पुर्‍याउने र विशेषगरी आर्थिक साझेदारीलाई प्राथमिकता दिने विषयमा दुवै पक्ष सहमत भएको जानकारी दिएका छन्।

भेटका क्रममा व्यापार, लगानी र आर्थिक विकासका क्षेत्रमा द्विपक्षीय सहकार्यलाई अझ फराकिलो बनाउने विषयले मुख्य प्राथमिकता पाएको छ । नेपालमा अमेरिकी लगानी भित्र्याउने र व्यापारिक सम्बन्धलाई थप सुदृढ बनाउँदै दुवै देशको साझा हितका लागि आर्थिक अवसरहरू खोजी गर्ने प्रतिबद्धता परराष्ट्रमन्त्री खनाल र सहायक विदेशमन्त्री कपुरले व्यक्त गरेका छन् । लामो समयदेखिको कूटनीतिक सहकार्यलाई अब परिणाममुखी आर्थिक विकासको आधारसँग जोडेर अघि बढाउने र यस्ता उच्चस्तरीय संवादलाई निरन्तरता दिने समझदारी समेत दुई पक्षबिच भएको छ।

नेपाल भ्रमणको सिलसिलामा हिजो मात्रै काठमाडौँ आइपुगेका सहायक विदेशमन्त्री कपुरको राजनीतिक सक्रियता निकै बाक्लो देखिएको छ। उनले भ्रमणको पहिलो दिन नै राष्ट्रिय स्वतन्त्र पार्टीका सभापति रवि लामिछाने र नेपालका प्रतिष्ठित उद्योगपतिहरूसँग छुट्टाछुट्टै छलफल गरिसकेका छन् । कपुरको यो भ्रमणलाई नेपालको बदलिँदो राजनीतिक परिदृश्य र आर्थिक विकासका एजेन्डामा अमेरिकी चासोका रूपमा हेरिएको छ ।

परराष्ट्रमन्त्रीसँगको भेटवार्ता लगत्तै आजै उनले अर्थमन्त्री स्वर्णिम वाग्लेसँग पनि भेट्ने कार्यक्रम तय भएको छ, जसले नेपालको आर्थिक कूटनीतिमा थप महत्त्व राख्ने अपेक्षा गरिएको छ ।