ट्याक्टर दुर्घटना हुँदा एक जना बालकको मृत्यु

रौतहट- राजपुर नगरपालिका वडा नं.१ पिपरा भगवानपुर टोलस्थित भित्री सडक खण्डमा बिहीबार ट्याक्टर दुर्घटना हुँदा एक जना बालकको मृत्यु भएको छ।

जिल्ला प्रहरी कार्यालय राैतहटका अनुसार अपराह्न करिब पाैने तीन बजे अमेरी मस्जिदबाट कब्रिस्तान तर्फ जाँदै गरेको ना. ६ त ५४४० नम्बरको ट्याक्टर आफैं अनियन्त्रित भई दुर्घटना हुदा आफ्नो मामा घर बस्दै आएको ८ बर्षिय बालककाे मृत्यु भएको छ ।

स्थानीय शेख वजिलको घरमा खेलिरहेका भारतको मोतिहारी जिल्ला पडरी गाउँ घर भई मामाको घर राजपुर नगरपालिका वडा नं. १ पिपरा भगवानपुरमा बस्दै आएकाे अन्दाजी ८ वर्षीय शेख सादिक ट्याक्टरकाे चपेटमा परि गम्भीर घाइते भएका थिए।

दुर्घटनामा टाउकोमा गम्भीर चोट लागेका सादिकलाई तत्काल उपचारका लागि प्रादेशिक अस्पताल गौर लगिए पनि अस्पतालमा चिकित्सकले जाँच गर्दा करिब सवा ३ बजे मृत घोषणा गरेकाे राैतहट प्रहरीले जनाएको छ ।

मृतकको शव सोही अस्पतालमा राखिएको छ। दुर्घटनामा संलग्न ट्याक्टर चालक फरार रहेका छन् भने चालककाे पहिचान खुल्न सकेको छैन। दुर्घटना भएको ट्याक्टर जिल्ला प्रहरी कार्यालयको नियन्त्रणमा रहेको छ र फरार चालकको खोजी कार्य भइरहेको छ।