विराटनगरका व्यवसायी गुप्ता केशलिया खोला किनारमा मृत फेला, हत्याको आशंका

विराटनगर, ८ कात्तिक ।

विराटनगरमा लामो समयदेखि व्यवसाय गर्दै आएका ६५ वर्षीय लालजीप्रसाद गुप्ता मृत अवस्थामा भेटिएका छन्। मोरङको विराटनगर महानगरपालिका–६ र सुनसरीको बर्जु गाउँपालिका जोड्ने केशलिया खोलाको पुल नजिकै उनको शव फेला परेको हो।

भारतीय नागरिक रहेका गुप्ता विगत ३० वर्षदेखि विराटनगर–६ स्थित महावीर रोडमा ‘लाल ब्याट्री पसल’ सञ्चालन गर्दै आएका थिए।

बोरामा बेरिएको अवस्थामा शव फेला आइतबार बिहान सुनसरीको बर्जु गाउँपालिका–२ भीमपुरतर्फ खोला किनारमा स्थानीयले बोरामा पोको पारिएको अवस्थामा शव देखेपछि प्रहरीलाई खबर गरेका थिए।

जिल्ला प्रहरी कार्यालय सुनसरीका प्रवक्ता तथा प्रहरी नायब उपरीक्षक (डिएसपी) चन्द्र खड्काका अनुसार घटनाको प्रकृति हेर्दा गुप्ताको हत्या गरी शव फालिएको जस्तो देखिएको छ। बोरामा बेरिएर फालिएकाले घटना शंकास्पद रहेको र प्रहरीले विभिन्न कोणबाट विस्तृत छानबिन सुरु गरिसकेको उनले जानकारी दिए।

घटनास्थलमा तालिमप्राप्त कुकुर तथा प्राविधिक टोली परिचालन गरी प्रहरीले आवश्यक प्रमाणहरू संकलन गरेको जनाएको छ।