दसैँ–तिहार लक्षित सार्वजनिक सवारीको अग्रिम टिकट बुकिङ असोज २३ देखि

पर्सा, २० असोज । दसैँ तथा तिहारजस्ता ठूला चाडपर्वलाई लक्षित गर्दै लामो तथा मध्यम दूरीका सार्वजनिक सवारीसाधनको अग्रिम टिकट बुकिङ असोज २३ गतेदेखि खुला गरिने भएको छ।

यातायात व्यवस्था विभागमा मंगलबार व्यवसायी तथा सरोकारवाला निकायबीच भएको संयुक्त बैठकले चाडपर्वका बेला यात्रुको सहज आवतजावतका लागि अग्रिम टिकट बुकिङ खुला गर्ने निर्णय गरेको हो।

बैठकले फूलपातीदेखि पूर्णिमासम्म लामो तथा मध्यम दूरीका सार्वजनिक सवारीसाधन र रिजर्भ गाडीलाई देशभर सञ्चालन गर्न रुट परमिट खुला गर्ने निर्णयसमेत गरेको यातायात व्यवस्था विभागका महानिर्देशक राजीव पोखरेलले जानकारी दिए।

चाडपर्वका समयमा सडकमा सवारीसाधनको चाप बढ्ने भएकाले फलफूल, तरकारी, औषधि, खाद्यान्न तथा खसीबोकालगायत अत्यावश्यक सामग्री बोकेका सवारीसाधनलाई प्राथमिकता दिइने भएको छ।

यात्रुलाई ठगी तथा कालोबजारीबाट जोगाउन र सार्वजनिक यातायातको भाडादरमा पारदर्शिता कायम गर्न प्रमुख नाका तथा बसपार्कमा सहायता कक्ष स्थापना गरिने भएको छ।

यसैबीच, नेपाल यातायात व्यवसायी राष्ट्रिय महासंघका अध्यक्ष सरोज सिटौलाले चाडपर्वको समयमा सार्वजनिक यातायातको भाडा नबढ्ने बताएका छन्। उनले पूर्वनिर्धारित भाडादरमै यात्रुलाई सेवा उपलब्ध गराउने प्रतिबद्धता जनाएका छन्।

वर्षा तथा प्राकृतिक प्रकोपका कारण विभिन्न स्थानमा सडक बिग्रिएको अवस्थामा चालकलाई जोखिम मोलेर सवारीसाधन सञ्चालन नगर्नसमेत आग्रह गरिएको छ। यात्रुको सुरक्षालाई प्राथमिकतामा राख्दै सडकको अवस्था हेरेर मात्र सवारी सञ्चालन गर्न सम्बन्धित पक्षलाई आग्रह गरिएको विभागले जनाएको छ।