धनुषामा जग्गा विवादमा कुटपिटको आरोप, जाहेरीपछि पनि आरोपी पक्राउ नपरेको पीडितको गुनासो

जनकपुरधाम । धनुषाको कमला नगरपालिका–७ का शिवकुमार कौशलले आफू र छोरामाथि कुटपिट गरेको आरोप लागेका व्यक्तिहरूलाई प्रहरीले अझै पक्राउ नगरेको भन्दै न्यायका लागि पहल गरिदिन आग्रह गरेका छन्।

जग्गासम्बन्धी विवादका क्रममा आफू र आफ्ना छोरा चन्द्रिका कौशलमाथि कुटपिट भएको भन्दै कौशलले जिल्ला प्रहरी कार्यालय धनुषामा जाहेरी दिएका छन्। जाहेरीमा नवीनकुमार महतो, धर्मेन्द्रकुमार महतो र रूपेशकुमार महतोविरुद्ध ज्यान मार्ने उद्योगसम्बन्धी आरोप लगाइएको छ।

कौशलका अनुसार २०८३ साउन १५ गते राति कमला नगरपालिका–७ स्थित खेतमा जग्गासम्बन्धी विवादलाई लिएर उनी र उनका छोरामाथि कुटपिट भएको थियो। घटनाका क्रममा आफूहरूमाथि ढुंगा तथा लाठी प्रहार गरिएको र ज्यान मार्ने धम्कीसमेत दिइएको उनको आरोप छ।

कुटपिटबाट घाइते भएका आफू र छोराको जनकपुरधामस्थित जानकी मेडिकल कलेज शिक्षण अस्पताल, रामदैयामा उपचार गरिएको कौशलले बताएका छन्।

घटनाबारे प्रहरीमा जाहेरी दिइसक्दा पनि आरोपितहरू पक्राउ नपरेको भन्दै कौशलले प्रहरी अनुसन्धानप्रति असन्तुष्टि व्यक्त गरेका छन्। उनले घटनाको निष्पक्ष अनुसन्धान गरी संलग्न भनिएका व्यक्तिहरूलाई तत्काल कानुनी दायरामा ल्याउन माग गरेका छन्।

“घटना भएको विषयमा जाहेरी दिइसकेपछि पनि संलग्न भनिएका व्यक्तिहरू पक्राउ नपर्दा हामीलाई न्याय पाइन्छ कि पाइँदैन भन्ने चिन्ता भएको छ,” कौशलले भने।

कौशलले आफूहरूले व्यक्तिगत प्रतिशोध नभई कानुनी प्रक्रियामार्फत न्याय खोजिरहेको बताएका छन्। उनले प्रहरी प्रशासनसँग घटनाको प्रभावकारी अनुसन्धान गरी दोषी ठहरिने व्यक्तिमाथि कानुनअनुसार कारबाही अघि बढाउन आग्रह गरेका छन्।

नोट: घटनामा आरोपित पक्षको धारणा यस समाचारमा समेटिएको छैन। उनीहरूको प्रतिक्रिया प्राप्त भएमा समाचारलाई थप अद्यावधिक गर्न सकिन्छ।