बिर्तामोडमा फर्निचर उद्योगमा भीषण आगलागी, दुई सोरुम पूर्ण रूपमा क्षतिग्रस्त

पर्सा, २१ असोज 

झापा । झापाको बिर्तामोड नगरपालिका–४ स्थित अन्नपूर्ण चोकमा फर्निचर उद्योग तथा सोरुममा लागेको आगो करिब साढे दुई घण्टापछि पूर्ण रूपमा नियन्त्रणमा आएको छ।

बुधबार बिहान १०ः४५ बजे हर्क सुब्बाले सञ्चालन गर्दै आएको देवी उडन फर्निचर फ्याक्ट्री एण्ड सोरुमबाट आगलागी सुरु भएको थियो। आगो नियन्त्रणका लागि स्थानीय, सुरक्षाकर्मी तथा दमकलको सहयोगमा प्रयास गरिएको थियो।

आगलागीका कारण सोही घरसँग जोडिएको कृष्णकुमारी राईको घरमा भाडामा बस्दै आएकी दिव्याश्री अग्रवालले सञ्चालन गर्दै आएको जय ट्रेड फर्निचर फ्याक्ट्री एण्ड सोरुममा समेत पूर्ण रूपमा क्षति पुगेको इलाका प्रहरी कार्यालय बिर्तामोडले जनाएको छ।

आगोको रापका कारण पछाडिपट्टि रहेका अन्य दुई घरमा समेत सामान्य क्षति पुगेको प्रहरीले जनाएको छ।

आगलागीका क्रममा सामान निकाल्ने प्रयास गर्दा अर्जुनधारा नगरपालिका–३ का करिब ३९ वर्षीय तिलबहादुर रम्तेल घाइते भएका छन्। आगलागी भएको घरबाट सामान निकाल्ने क्रममा एक तला माथिबाट हाम फाल्दा उनको दाहिने खुट्टामा चोट लागेको प्रहरीले जनाएको छ।

घाइते रम्तेलको बिर्तासिटी अस्पतालमा उपचार भइरहेको छ। उनको अवस्था सामान्य रहेको प्रहरीले जनाएको छ।

आगलागीको कारण भने हालसम्म खुल्न सकेको छैन। प्रहरीले घटनाको कारणबारे अनुसन्धान भइरहेको जनाएको छ। आगलागीबाट भएको क्षतिको यकिन विवरण तथा अनुमानित मूल्य संकलन गर्ने कामसमेत भइरहेको प्रहरीले जनाएको छ।