चार दिनदेखि बन्द बीपी राजमार्ग मंगलबार बेलुकासम्म सञ्चालनमा ल्याउने प्रयास

काभ्रे । रोशी खोलाको कटान तथा विभिन्न स्थानमा गएको पहिरोका कारण चार दिनदेखि पूर्णरूपमा अवरुद्ध रहेको बीपी राजमार्ग मंगलबार बेलुकासम्म सञ्चालनमा ल्याउने प्रयास भइरहेको छ।

काभ्रेको रोशी गाउँपालिका क्षेत्रमा रोशी खोलाले सडक कटान गर्नुका साथै विभिन्न स्थानमा पहिरो खसेपछि बीपी राजमार्गको काभ्रे खण्ड पूर्णरूपमा अवरुद्ध भएको हो।

राजमार्गको चौकीडाँडा, गुमाउने, गिम्दीबेँसी, चारसयबेँसी र पन्थली लगायतका स्थानमा रोशी खोलाको कटान तथा पहिरोका कारण सडकमा क्षति पुगेको छ। काभ्रे खण्डमा मात्रै रोशी खोलाले करिब छ स्थानमा सडक कटान गरेको जनाइएको छ।

क्षतिग्रस्त सडकखण्डमा सडक डिभिजन कार्यालय भक्तपुर तथा सम्बन्धित निकायले मर्मत तथा पुनर्निर्माणको काम तीव्र बनाएका छन्। सडक डिभिजन कार्यालय भक्तपुरका अनुसार चार स्थानमा एकैपटक मर्मतको काम भइरहेको इन्जिनियर हिमाल काफ्लेले जानकारी दिए।

ट्राफिक प्रहरी सहायक निरीक्षक महेश्वर अधिकारीका अनुसार सडक मर्मतको काम तीव्र रूपमा अघि बढिरहेको छ। मंगलबार बेलुकासम्म बीपी राजमार्ग सञ्चालनमा ल्याउन सक्ने गरी काम भइरहेको उनले बताए।

उनका अनुसार बीपी राजमार्ग हुँदै आवतजावत गर्ने सबै सवारीसाधनलाई हाल धुलिखेलमै होल्ड गरिएको छ।

काभ्रेका प्रमुख जिल्ला अधिकारी गोपाल अधिकारीले पनि मंगलबार बेलुकासम्म राजमार्ग खुलाउने प्रयास भइरहेको जानकारी दिए। उनका अनुसार सोमबार इन्जिनियरसहितको प्राविधिक टोलीले बीपी राजमार्गका क्षतिग्रस्त विभिन्न स्थानको स्थलगत निरीक्षण गरेको थियो।

स्थलगत निरीक्षणपछि सडक खुलाउन आवश्यक मर्मत तथा पुनर्निर्माणको कामलाई थप तीव्रता दिइएको प्रमुख जिल्ला अधिकारी अधिकारीले बताए।

बीपी राजमार्ग चार दिनदेखि अवरुद्ध हुँदा काभ्रे हुँदै पूर्वी नेपालतर्फ जाने तथा काठमाडौं आउने–जाने यात्रु र सवारीसाधन प्रभावित भएका छन्। सडक सञ्चालनमा आएपछि यस क्षेत्रमा रोकिएका सवारीसाधनको आवागमन सहज हुने अपेक्षा गरिएको छ।

– काठमाडौं बुलेटिन