कपिलवस्तुमा हिन्दु समुदायमाथि हमला प्रकरण : विश्व हिन्दु महासंघद्वारा दोषीमाथि कडा कारबाहीको माग

वीरगञ्ज । कपिलवस्तु जिल्लाको महाराजगंज नगरपालिका–२ बरगदा क्षेत्रमा शान्तिपूर्ण रूपमा बसोबास गर्दै आएका हिन्दु समुदायमाथि हालै भएको साङ्घातिक तथा सुनियोजित आक्रमणप्रति नेपाल विश्व हिन्दु महासंघले गम्भीर आपत्ति जनाएको छ। महासंघले उक्त अमानवीय र निन्दनीय घटनाको कडा शब्दमा भर्त्सना गर्दै दोषीमाथि त्वरित र कडा कारबाहीको माग गरेको छ।

महासंघका महासचिव डा. अभिषेक तिवारीद्वारा जारी विज्ञप्तिमा धार्मिक सहिष्णुता, आपसी सद्भाव र सामाजिक एकताको ऐतिहासिक परम्परा बोकेको समाजमा यस्ता आक्रमण कुनै पनि हालतमा स्वीकार्य नहुने उल्लेख गरिएको छ। कपिलवस्तुका विभिन्न स्थानमा शान्ति–सुरक्षा खलबल्याउने, सामाजिक सद्भाव बिगार्ने र सर्वसाधारणमा भय उत्पन्न गराउने उद्देश्यले गरिएको यस्तो कायरतापूर्ण कार्यले गम्भीर चिन्ता बढाएको महासंघले जनाएको छ।घटनामा संलग्न अपराधीहरूलाई तत्काल पहिचान गरी पक्राउ गरी कानुन बमोजिम कडा भन्दा कडा सजाय दिलाउन सरकारसमक्ष महासंघले जोडदार माग गरेको छ।

यस्तै, आक्रमणमा परेर घाइते भएका सबैको शीघ्र स्वास्थ्य लाभको कामना गर्दै महासंघले उनीहरूको प्रभावकारी उपचार व्यवस्था मिलाउन तथा पीडित समुदायलाई सुरक्षाको भरपर्दो प्रत्याभूति दिलाउन सरकारलाई आग्रह गरेको छ।