५ वर्ष नै बालेन नेतृत्वको सरकार चल्छ : रवि लामिछाने

काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले प्रधानमन्त्री वालेन्द्र शाह ‘बालेन’ नेतृत्वको सरकार आगामी पाँच वर्षसम्म निरन्तर चल्ने बताएका छन्।

रास्वपाको केन्द्रीय समिति बैठकलाई सम्बोधन गर्दै लामिछानेले सरकारको नेतृत्व परिवर्तन नहुने स्पष्ट पारेका हुन्। उनले बालेनलाई पाँच वर्ष प्रधानमन्त्रीका रूपमा स्वीकार गर्न आफू तयार रहेको बताएका छन्।

बैठकमा लामिछानेले भनेका थिए, ‘ल्याप्चे नै लगाउनुपर्छ भने पनि म तयार छु। पाँच वर्ष प्रधानमन्त्री वालेन्द्र शाहकै नेतृत्वमा सरकार चल्छ।’ उनको भनाइ सार्वजनिक भएपछि रास्वपाभित्रको नेतृत्व र सत्ता समीकरणबारे चर्चा चुलिएको छ।

लामिछानेले सरकारसँग आफ्नो कुनै दूरी नरहेको उल्लेख गर्दै सरकार सही दिशामा अघि बढिरहेको दाबीसमेत गरेका छन्। उनले पार्टी संगठनलाई थप मजबुत बनाउन केन्द्रदेखि तल्लो तहसम्म सक्रिय हुन केन्द्रीय सदस्यहरूलाई निर्देशन दिएका छन्।

उनले पार्टीले ठूलो जनमत प्राप्त गरेको उल्लेख गर्दै जनताले गरेको अपेक्षा र विश्वास पूरा गर्न सरकारलाई आवश्यक सहयोग गर्नुपर्ने बताए। पार्टीभित्र अनुशासनलाई थप कडाइका साथ पालना गर्नसमेत उनले निर्देशन दिएका छन्।

बैठकमा रास्वपा उपसभापति तथा कानुन, न्याय तथा संसदीय मामिलामन्त्री सोविता गौतमले सरकारका कामकारबाहीबारे जानकारी गराएकी थिइन्।

बैठकमा केही केन्द्रीय सदस्यहरूले सरकारका कामकारबाही प्रभावकारी बनाउनुपर्ने धारणा राखेका थिए। साथै आगामी स्थानीय तहको निर्वाचनको तयारीलाई प्रभावकारी ढंगले अघि बढाउनुपर्ने विषयमा पनि छलफल भएको थियो।