बालेनमाथि रक्षा बमको शब्द प्रहार : ‘जेनजीले रगत नबगाएको भए कहाँ पुग्थे?’

काठमाडौं । खुलामञ्चमा नेपाली कांग्रेसको १५औँ महाधिवेशन चलिरहेको प्रसङ्गलाई लिएर प्रधानमन्त्री बालेन शाहले सामाजिक सञ्जालमार्फत गरेको टिप्पणीप्रति जेनजी अभियन्ता रक्षा बमले तीखो प्रतिक्रिया जनाएकी छन्।
प्रधानमन्त्री शाहको व्यङ्ग्यात्मक टिप्पणीपछि आइतबार फेसबुकमार्फत प्रतिक्रिया दिँदै अभियन्ता बमले नयाँ पुस्ताको आन्दोलन, त्यस क्रममा भएको रगत र बलिदानकै जगमा अहिलेको राजनीतिक नेतृत्वले अवसर पाएको दाबी गरेकी छन्।
बमले लेखेकी छन्, ‘धन्न जेन-जीहरूले आन्दोलन गर्दिएर, रगत बगाइदिएर, घाइते/सहिद भइदिएर, सामान्य राजनीतिक संस्कारसमेत नभएकाहरू प्रधानमन्त्री, मन्त्री र सांसद हुन पाएका छन्।’
उनको यो अभिव्यक्ति प्रधानमन्त्री शाहको यसअघिको सामाजिक सञ्जाल पोस्टप्रति लक्षित देखिन्छ।
यसअघि खुलामञ्चमा जारी नेपाली कांग्रेसको १५औँ महाधिवेशनमा सभापति गगन थापाले प्रधानमन्त्री संसद्मा उपस्थित नहुने गरेको भन्दै प्रश्न उठाएका थिए।
थापाको टिप्पणीपछि प्रधानमन्त्री शाहले सामाजिक सञ्जालमा ‘धन्न खुलामञ्च राम्रो बनाइएछ, नयाँ पार्टीले कार्यक्रम गरेर गाली गर्न पाएका छन्’ भन्दै व्यङ्ग्यात्मक टिप्पणी गरेका थिए।
प्रधानमन्त्री शाहको उक्त अभिव्यक्तिपछि बमले सामाजिक सञ्जालमार्फत जवाफ दिँदै राजनीतिक नेतृत्वको संस्कार, मर्यादा र नयाँ पुस्ताको आन्दोलनको योगदानबारे प्रश्न उठाएकी हुन्।
बमको प्रतिक्रियाले प्रधानमन्त्री शाह र जेनजी आन्दोलनसँग जोडिएका अभियन्ताबीच सामाजिक सञ्जालमा पुनः राजनीतिक बहस चर्किने संकेत देखिएको छ।