दोलखामा दुई मोटरसाइकल ठोक्किँदा एक जनाको मृत्यु, दुई जना गम्भीर घाइते

हेटौँडा : लामोसाँघु–जिरी सडकखण्डस्थित दोलखा जिल्लाको भिमेश्वर नगरपालिका–५ पिपलबोटमा दुई मोटरसाइकल एकआपसमा ठोक्किँदा एक जनाको मृत्यु भएको छ भने दुई जना गम्भीर घाइते भएका छन् । शुक्रबार साँझ ७ बजेर १० मिनेटको समयमा चरिकोटबाट जिरीतर्फ जाँदै गरेको बा.प्र.०२–०६२ प ८४६६ नम्बरको मोटरसाइकल र विपरीत दिशाबाट आउँदै गरेको बा ८० प ७९७३ नम्बरको मोटरसाइकल एकआपसमा ठोक्किएको बागमती प्रदेश प्रहरी कार्यालय हेटौँडाले जानकारी दिएको छ ।

दुर्घटनामा ७९७३ का चालक बैतेश्वर गाउँपालिका–८ क्षेत्रपाका २२ वर्षीय रसिक श्रेष्ठ गम्भीर घाइते भएका थिए । उनलाई उपचारका लागि पशुपति चौलागाई स्मृति अस्पताल लगिएकोमा ८ बजेर २५ मिनेटको समयमा चिकित्सकले मृत घोषणा गरेको प्रहरीले जानकारी दिएको छ । दुर्घटनामा ८४६६ नम्बरका मोटरसाइकल चालक बैतेश्वर गाउँपालिका–२ पुतलीकाठका २६ वर्षीय उमेश तामाङ र भिमेश्वर नगरपालिका–६ चोथाङका १९ वर्षीय विवेक थामी गम्भीर घाइते भएका छन् । दुवै जनाको धुलिखेल अस्पतालमा उपचार भई रहेको छ ।