दुर्गा प्रसाईँविरुद्ध अदालतमा मुद्दा दायर, ५ वर्ष कैद र जरिवानाको माग

९ बैशाख, काठमाडौं । मेडिकल व्यवसायी दुर्गा प्रसाईँविरुद्ध विद्युतीय (इलेक्ट्रोनिक) कारोबार ऐन अन्तर्गतको कसुरमा काठमाडौँ जिल्ला अदालतमा मुद्दा दायर गरिएको छ ।

जिल्ला सरकारी वकिल कार्यालयले प्रसाईँलाई विद्युतीय कारोबार ऐन, २०६३ को दफा ४७ बमोजिम अधिकतम ५ वर्षसम्म कैद र १ लाख रुपैयाँसम्म जरिवाना गर्न माग गर्दै अभियोगपत्र दर्ता गरेको हो । प्रसाईँले पटक–पटक यस्तो कसुर गरेको भन्दै थप सजाय र पीडित राहत कोषमा क्षतिपूर्ति शुल्क भराउनसमेत माग गरिएको छ ।

प्रसाईँमाथि सामाजिक सञ्जाल (फेसबुक) मार्फत आगामी निर्वाचनका सन्दर्भमा भ्रामक, उत्तेजक र हिंसात्मक अभिव्यक्ति दिएको गम्भीर आरोप लागेको छ । विशेषगरी २०८२ फागुन २१ गतेका लागि तय गरिएको निर्वाचनको विरोधमा उनले दिएका अभिव्यक्तिहरूले समाजमा वैमनस्यता फैलाउन खोजेको प्रहरी अनुसन्धानको निष्कर्ष छ ।

उनले निर्वाचन भएमा ‘देश टुक्रिन्छ’ र ‘अशान्ति मच्चिन्छ’ भन्दै निर्वाचन आचारसंहिता, २०८२ को समेत ठाडो उल्लंघन गरेको अभियोगपत्रमा उल्लेख गरिएको छ ।

प्रमाणका रूपमा पेश गरिएका भिडियोहरूमा प्रसाईँले राजसंस्था र हिन्दु राज्य कायम नभएसम्म निर्वाचन हुन नदिने अडान राख्दै ‘मर्न र मार्न तयार हुने’ जस्ता उत्तेजक शब्दहरू प्रयोग गरेका छन् ।

यस्ता अभिव्यक्तिले सार्वजनिक शान्ति र सुरक्षामा चुनौती थपेको सरकारी पक्षको दाबी छ । अब यो मुद्दामा अदालतले गर्ने थप सुनुवाइ र फैसलाले प्रसाईँको राजनीतिक तथा व्यवसायिक भविष्यमा ठूलो प्रभाव पार्ने देखिएको छ ।