‘हामीलाई दशैं उत्सव, निर्दोष पशुका लागि दशैं दशा’ : सांसद तामाङ

काठमाडौं — राष्ट्रिय स्वतन्त्र पार्टी (रास्वपा) की सांसद आशिका तामाङले दशैंका अवसरमा पशुबलिका नाममा निर्दोष पशुपन्छीमाथि हुने क्रूर व्यवहार रोक्न सरकारसँग माग गरेकी छन्।

शुक्रबार प्रतिनिधि सभाको बैठकमा बोल्दै सांसद तामाङले दशैं मानिसका लागि उत्सव र धार्मिक आस्थाको पर्व भए पनि पशुपन्छीका लागि भने पीडादायी बन्ने गरेको बताइन्। उनले दशैंका क्रममा पशुबलिका नाममा हुने हिंसा तथा पशुमाथि गरिने अमानवीय व्यवहार नियन्त्रण गर्न सरकार गम्भीर बन्नुपर्ने धारणा राखिन्।

सांसद तामाङले दशैंमा देवी दुर्गाको आराधना र धार्मिक पक्षभन्दा खसी, बोका तथा राँगा काट्ने विषयले बढी प्राथमिकता पाउने गरेको टिप्पणी गरिन्।

उनले भनिन्, ‘हामीलाई दशैं उत्सव हुन सक्छ, तर निर्दोष पशुहरूका लागि भने दशैं दशा नै हो, सभामुख महोदय। किनभने दशैंमा माता दुर्गाको आराधनाभन्दा पनि खसी, बोका र राँगा कसरी काट्ने भन्ने सोचमा बढी ध्यान जाने गरेको छ।’

दशैंका बेला पशुहरूमाथि हुने व्यवहारप्रति आपत्ति जनाउँदै उनले खेतका आली तथा सार्वजनिक स्थानमा पशुलाई लखेट्ने, भीडभाडका बीच धारिलो हतियार प्रयोग गर्ने तथा लौरीले कुट्ने जस्ता क्रियाकलाप हुने गरेको बताइन्।

‘खेतका आली–आलीमा लखेट्दै, भीडभाडमा तरबारले घोच्दै वा लौरीले ढाडमा कुट्दै पशुहरूमाथि क्रूर व्यवहार गरिन्छ। यस्तै दृश्यहरू दशैंमा हेर्दै म यही समाजमा हुर्किएकी हुँ,’ उनले भनिन्।

उनका अनुसार दशैंका बेला ठूलो संख्यामा पशुपन्छीको सार्वजनिक रूपमा बलि दिने प्रचलन रहेको छ। यस्तो क्रममा पशुमाथि हुने व्यवहारलाई धार्मिक परम्पराको नाममा मात्रै हेर्न नहुने उनको भनाइ थियो।

बाल्यकालदेखि नै पशुमाथिको क्रूरता देख्दै आएको दाबी

सांसद तामाङले आफूले सानैदेखि दशैंका बेला पशुमाथि हुने यस्ता व्यवहार देख्दै आएको उल्लेख गरिन्। उनले पशुप्रति हुने क्रूरता नियन्त्रणका लागि विश्वका विभिन्न मुलुकमा कानुनी व्यवस्था रहेको उदाहरणसमेत प्रस्तुत गरिन्।

उनले पशुमाथि अनावश्यक पीडा र क्रूर व्यवहार गर्ने कार्यलाई नियन्त्रण गर्न प्रभावकारी कानुन तथा त्यसको कार्यान्वयन आवश्यक रहेको बताइन्।

नेपालमा पनि पशु कल्याणका लागि कानुनी तथा नीतिगत व्यवस्था रहेको भए पनि त्यसको कार्यान्वयन प्रभावकारी हुन नसकेको भन्दै उनले सरकारको ध्यानाकर्षण गराइन्।

सांसद तामाङले प्रश्न गरिन्, ‘हाम्रो देशमा पशु कल्याणका लागि बनेको कानुनी व्यवस्था किन यति कमजोर छ ? पशु सेवाका नाममा बनेका नीतिले पशुबाट मेवा मात्र लिने तर उनीहरूको वास्तविक सेवा र कल्याण नगर्ने अवस्था कहिलेसम्म रहन्छ ?’

पशु कल्याणसम्बन्धी नीति सुधार गर्न माग

सांसद तामाङले पशु कल्याणसम्बन्धी विद्यमान नीति तथा कानुनी व्यवस्थाको प्रभावकारी कार्यान्वयनसँगै आवश्यक सुधार गर्न सरकारसँग माग गरेकी छन्।

उनले धार्मिक आस्था र परम्पराको सम्मान गर्दै पशुमाथि अनावश्यक पीडा तथा क्रूर व्यवहार हुन नदिने गरी राज्यले स्पष्ट नीति बनाउनुपर्ने धारणा राखिन्।

पशु कल्याणका लागि बनेका कानुन कागजमा मात्र सीमित नभई व्यवहारमा समेत कार्यान्वयन हुनुपर्ने उनको जोड थियो।

उनले दशैं लगायतका चाडपर्वमा पशुपन्छीमाथि हुने क्रूर व्यवहार नियन्त्रण गर्न सम्बन्धित सरकारी निकायलाई प्रभावकारी अनुगमन र आवश्यक कदम चाल्न आग्रह गरिन्।

सांसद तामाङको भनाइले दशैंका बेला हुने पशुबलि, धार्मिक परम्परा र पशु कल्याणसम्बन्धी बहसलाई पुनः प्रतिनिधि सभामा प्रवेश गराएको छ। उनले पशु कल्याणलाई राज्यको नीतिगत प्राथमिकतामा राख्दै पशुमाथि हुने क्रूरता नियन्त्रणका लागि सरकार गम्भीर बन्नुपर्ने बताएकी छन्।