कांग्रेस महाधिवेशनमा ९ हजार जनाका लागि भोजन व्यवस्थापन, बिहान कुखुरा, खसीको मासू र अण्डा, बेलूका सादा खाना

पर्सा, २० असोज 

काठमाडौं । नेपाली कांग्रेसको १५औँ महाधिवेशनमा सहभागी प्रतिनिधि, पर्यवेक्षक, स्वयंसेवक तथा अन्य गरी करिब ८ हजार ५ सयदेखि ९ हजार जनाका लागि भोजनको व्यवस्था गरिएको छ।

भोजन व्यवस्थापन समितिका संयोजक तिलक रानाभाटका अनुसार असोज १९ देखि २२ गतेसम्म महाधिवेशनमा सहभागीका लागि बिहानको खाजा, दिउँसोको खाना, चिया–कुकिज तथा बेलुकाको खानाको व्यवस्था गरिएको हो।

उनका अनुसार बिहानको खाजा, दिउँसोको खाना र बेलुकाको खानाका लागि सहभागीहरू भृकुटीमण्डप पुग्नुपर्नेछ। दिउँसो २ बजेदेखि ५ बजेसम्म चिया–कुकिजको व्यवस्था गरिनेछ भने साँझ ५ः३० देखि ८ः३० बजेसम्म बेलुकाको खाना उपलब्ध हुनेछ।

महाधिवेशनमा करिब ७ हजार ८ सय प्रतिनिधि सहभागी हुनेछन्। पर्यवेक्षक, स्वयंसेवक तथा अन्यलाई समेत जोड्दा करिब ९ हजार जनाका लागि भोजन व्यवस्थापन गर्नुपर्ने रानाभाटले बताए।

बिहानको खाजामा भटुरा, अन्डा, फलफूल र ब्रेड राखिएको छ। दिउँसोको खानामा भेज तथा ननभेज दुवै विकल्प रहनेछन्। ननभेज खानामा कुखुरा र खसीको मासुको व्यवस्था गरिएको समितिले जनाएको छ। बेलुकाको खाना भने सादा राखिएको छ।

भोजन व्यवस्थापनका लागि इन्ट्री फी तथा पार्टीको आन्तरिक स्रोतबाट कोष व्यवस्थापन गरिएको समितिले जनाएको छ।

यसपटक नेपाली कांग्रेसले महाधिवेशन प्रतिनिधिका लागि आवासको प्रत्यक्ष व्यवस्था नगर्ने भएको छ। पार्टीले आवासका लागि आवश्यक सहजीकरण मात्रै गर्ने जनाएको छ।