महोत्तरीमा युवकको शव टुक्रा–टुक्रा अवस्थामा फेला

महोत्तरीको बलवा नगरपालिका–७, बनौटामा एक युवकको शव घर पछाडिको सेफ्टी ट्याङ्कीभित्र टुक्रा–टुक्रा अवस्थामा फेला परेको छ।

प्रहरीका अनुसार मृतक भंगाहा नगरपालिका–६ निवासी अशोक कुमार वातरका करिब २२ वर्षीय छोरा विवेक कुमार सरदार हुन्।

विवेक भदौ १४ गते साँझ जलेश्वर नगरपालिका–९, पिगौनास्थित दिदीको घरबाट मोटरसाइकलमा आफ्नो घरतर्फ हिँडेपछि परिवारको सम्पर्कमा आएका थिएनन्। खोजीका लागि उनका बुबाले भदौ १६ गते जिल्ला प्रहरी कार्यालय महोत्तरीमा निवेदन दिएका थिए।

प्रहरीको खोजीका क्रममा बलवा–७ बनौटाका अशोक कुमार ठाकुरको घर पछाडिको सेफ्टी ट्याङ्कीमा विवेकको शव फेला परेको हो।

घटनाको अनुसन्धानका क्रममा घरधनी अशोक कुमार ठाकुरसहित उनकी श्रीमती रामकली देवी, बुहारी सोनु कुमारी ठाकुर र महोत्तरी गाउँपालिका–५ निवासी सियाराम शर्मालाई प्रहरीले नियन्त्रणमा लिएको जनाएको छ।

घटनाको कारण र हत्यामा कसको संलग्नता छ भन्ने विषयमा प्रहरीले थप अनुसन्धान गरिरहेको छ।