नेपाल भ्रमणमै केन्द्रित भएर काठमाडौँ आए अमेरिकी सहायक विदेशमन्त्री कपुर

७ बैशाख, काठमाडौं । दक्षिण तथा मध्य एसियाली मामिला हेर्ने अमेरिकी सहायक विदेशमन्त्री समीर पल कपुर आज बिहान काठमाडौँ आइपुग्नुभएको छ ।

उहाँको स्वागतका लागि नेपालस्थित अमेरिकी कार्यवाहक राजदूत स्कट अरबम आफैँ उपस्थित हुनुहुन्थ्यो । अन्य मुलुकको भ्रमणका क्रममा ‘ट्रान्जिट’ को रूपमा नेपाल आउने पुरानो परम्परालाई तोड्दै कपुर यसपटक विशेष रूपमा नेपाल भ्रमणकै उद्देश्यले अमेरिकाबाट सिधै काठमाडौँ ओर्लिनुभएको हो। यसलाई कूटनीतिक वृत्तमा अमेरिकाले नेपाललाई दिएको बढ्दो प्राथमिकताका रूपमा हेरिएको छ ।

काठमाडौँस्थित अमेरिकी दूतावासले सामाजिक सञ्जालमार्फत उहाँको आगमनको तस्बिर सार्वजनिक गर्दै यो भ्रमणले दुई देशबीचको साझेदारीलाई थप मजबुत बनाउने विश्वास व्यक्त गरेको छ ।

बालेन शाहको नेतृत्वमा नयाँ सरकार बनेपछि नेपाल आउने कपुर अहिलेसम्मकै उच्च अमेरिकी अधिकारी हुनुहुन्छ । आफ्नो छोटो तर अर्थपूर्ण भ्रमणका क्रममा उहाँले नेपालका सरकारी अधिकारीहरू, व्यावसायिक नेतृत्वकर्ताहरू र सांस्कृतिक विज्ञहरूसँग छुट्टाछुट्टै भेटघाट गर्ने तालिका रहेको छ ।

विशेषगरी अमेरिका–नेपाल सम्बन्धलाई सुदृढ बनाउने र आपसी हितका विषयमा छलफल गर्ने उहाँको मुख्य एजेन्डा रहेको दूतावासले जनाएको छ । क्षेत्रीय राजनीतिमा महत्त्वपूर्ण मानिने यो भ्रमणले नेपालको बदलिँदो राजनीतिक परिदृश्यमा अमेरिकी चासो र सहकार्यलाई नयाँ उचाइमा पुर्‍याउने अपेक्षा गरिएको छ ।