न्यायाधीश भएपछि राजनीतिको चप्पल अदालतबाहिरै खोलेको छु : जनक पाण्डे

बिरगंज, पर्सा, २१ कार्तिक 

काठमाडौं । सर्वोच्च अदालतको न्यायाधीशमा प्रस्तावित जनक पाण्डेले न्याय सम्पादनका क्रममा आफूले राजनीतिक विचार, आस्था र प्रभावलाई अदालतबाहिरै छाड्ने गरेको बताएका छन् ।

शनिबार संसदीय सुनुवाइ समितिमा भएको सुनुवाइका क्रममा सांसदहरूले उनको न्यायिक निष्पक्षता र विगतका फैसलाबारे प्रश्न उठाएका थिए । सोही क्रममा नेकपा एमालेकी सांसद पद्मा अर्यालले नक्कली भुटानी शरणार्थी प्रकरणमा पूर्वगृहमन्त्री बालकृष्ण खाणसम्बन्धी मुद्दामा फरक राय दिएको विषय उठाउँदै न्यायिक निष्पक्षता र जवाफदेहिताबारे प्रश्न गरेकी थिइन् ।

जवाफमा पाण्डेले न्यायाधीश भएपछि राजनीतिक आग्रह र पूर्वाग्रहबाट मुक्त भएर प्रमाण तथा मिसिलका आधारमा निर्णय गर्ने गरेको स्पष्ट पारे ।

‘म अदालतमा आइसकेपछि राजनीतिको चप्पल बाहिरै खोलेको छु । हामी न्यायाधीश भएपछि राजनीति गर्दैनौँ र गर्नु पनि हुँदैन,’ उनले भने ।

उनले अदालतमा राजनीतिक पृष्ठभूमि भएका व्यक्ति तथा दलसँग सम्बन्धित धेरै मुद्दा आउने भए पनि इजलासमा बसेपछि राजनीतिक विषयभन्दा प्रमाण र मिसिल महत्वपूर्ण हुने बताए ।

भुटानी शरणार्थी प्रकरणमा बालकृष्ण खाणलाई थुनामा राख्ने वा धरौटीमा छाड्ने भन्ने विषयमा आफूले तत्काल प्राप्त प्रमाणका आधारमा राय दिएको पाण्डेको भनाइ थियो ।

उक्त मुद्दामा आफू र अर्का न्यायाधीश प्रकाश खरेलबीच फरक राय आएको उनले स्पष्ट पारे । आफ्नो राय नै अन्तिम फैसला नभएको उल्लेख गर्दै तेस्रो न्यायाधीशको इजलासबाट अन्तिम आदेश भएको उनको भनाइ थियो ।

पाण्डेले हेटौँडामा रहँदा बागमती प्रदेशका मुख्यमन्त्रीसम्बन्धी मुद्दामा पनि राजनीतिक प्रभावभन्दा कानुनी अवस्था र प्रमाणलाई आधार बनाएर निर्णय गरेको उदाहरण प्रस्तुत गरे ।

मुख्यमन्त्रीले शपथ लिइसकेको र विश्वासको मतसमेत प्राप्त गरिसकेको अवस्थामा अन्तरिम आदेश जारी गर्नु उपयुक्त नदेखिएको उनले बताए ।

न्यायाधीशले राजनीतिक विचार बोकेको हुन सक्ने भए पनि न्याय सम्पादन गर्दा त्यसको प्रभाव पर्न नहुनेमा जोड दिँदै पाण्डेले आफूले सधैँ निष्पक्ष र प्रमाणमा आधारित न्याय सम्पादन गर्ने प्रतिबद्धता व्यक्त गरे ।

संसदीय सुनुवाइ समितिमा पाण्डेको न्यायिक निष्पक्षता र विगतका फैसलाबारे सांसदहरूले विभिन्न प्रश्न उठाएका थिए ।