प्रधान मंत्री बालेन : ‘धन्न खुलामञ्च राम्रो बनाइएछ, नयाँ पार्टीले गाली गर्न पाए’

काठमाडौं । नेपाली कांग्रेसको १५औँ महाधिवेशनको उद्घाटन समारोहमा कांग्रेस सभापति गगनकुमार थापाले प्रधानमन्त्री बालेन शाहको संसद् उपस्थितिलाई लिएर प्रश्न उठाएपछि प्रधानमन्त्री शाहले सामाजिक सञ्जालमार्फत व्यङ्ग्यात्मक जवाफ दिएका छन्।

आइतबार काठमाडौंको खुलामञ्चमा आयोजित नेपाली कांग्रेसको १५औँ महाधिवेशन उद्घाटन समारोहलाई सम्बोधन गर्दै सभापति थापाले संसद्, सरकार र राजनीतिक दलभित्र खुला बहस तथा प्रश्न गर्ने वातावरण आवश्यक रहेको बताएका थिए।

थापाले प्रधानमन्त्री शाह संसद्मा पर्याप्त रूपमा उपस्थित नहुने विषय उठाउँदै सरकारको नेतृत्व गर्ने व्यक्ति संसद्मा उपस्थित भएर जनप्रतिनिधिका प्रश्नको सामना गर्नुपर्ने धारणा राखेका थिए।

उनले संसद्को खुलापनको प्रसङ्ग जोड्दै राजनीतिक दल र संसद् दुवैमा फरक विचार तथा प्रश्नका लागि पर्याप्त स्थान हुनुपर्ने बताएका थिए।

थापाको उक्त अभिव्यक्तिपछि प्रधानमन्त्री शाहले सामाजिक सञ्जालमार्फत प्रतिक्रिया दिएका हुन्। शाहले लेखेका छन्, ‘धन्न खुला मञ्च राम्रो बनाइएछ, नयाँ पार्टीले कार्यक्रम गरेर गाली गर्न पाएका छन् !’

प्रधानमन्त्री शाहको यो अभिव्यक्तिलाई कांग्रेस महाधिवेशनमा आफूविरुद्ध गरिएको आलोचनाप्रतिको व्यङ्ग्यात्मक प्रतिक्रियाका रूपमा हेरिएको छ।

शाहले आफ्नो प्रतिक्रियामा काठमाडौं महानगरपालिकाको नेतृत्वमा रहँदा खुलामञ्च व्यवस्थित तथा सुधार गरिएको प्रसङ्गलाई समेत जोडेको देखिन्छ। कांग्रेसले सोही खुलामञ्चमा आफ्नो १५औँ महाधिवेशनको उद्घाटन समारोह आयोजना गरेको थियो।

महाधिवेशन उद्घाटनका क्रममा सभापति थापाले खुलामञ्चलाई राजनीतिक बहस र जनताको आवाज राख्ने महत्वपूर्ण सार्वजनिक थलोका रूपमा प्रस्तुत गरेका थिए। उनले संसद् र पार्टीभित्र समेत खुला रूपमा प्रश्न गर्न सकिने वातावरण आवश्यक रहेको बताएका थिए।

यसैबीच, थापाको अभिव्यक्तिपछि प्रधानमन्त्री शाहले सामाजिक सञ्जालमा दिएको छोटो प्रतिक्रियाले राजनीतिक वृत्तमा चर्चा पाएको छ। प्रधानमन्त्री र कांग्रेस सभापतिबीच सामाजिक सञ्जालमार्फत भएको यो व्यङ्ग्यात्मक संवादले सरकार र प्रमुख राजनीतिक शक्तिबीचको राजनीतिक बहसलाई थप सतहमा ल्याएको छ।

कांग्रेसको महाधिवेशनमा उठाइएको संसद्को भूमिका, प्रधानमन्त्रीको संसद् उपस्थिति र राजनीतिक दलभित्रको आन्तरिक लोकतन्त्र सम्बन्धी विषयमा आगामी दिनमा थप बहस हुने देखिएको छ।