रास्वपामा कुनै आन्तरिक विवाद छैन सरकार ५ वर्ष नै चल्छ : सांसद अमरेशकुमार सिंह

काठमाडौँ, १५ असोज । राष्ट्रिय स्वतन्त्र पार्टी (रास्वपा)का सांसद डा. अमरेशकुमार सिंहले पार्टीभित्र कुनै पनि किसिमको आन्तरिक विवाद तथा अन्तरविरोध नरहेको स्पष्ट पार्नुभएको छ।

बिहीबार संसद् भवन, सिंहदरबारमा सञ्चारकर्मीसँग कुरा गर्दै सांसद सिंहले रास्वपाका सम्पूर्ण नेता तथा कार्यकर्ता एकजुट र एकीकृत रहेको बताउनुभयो।

उहाँले रास्वपा सत्ता पक्षमा रहे पनि जनताका मुद्दा, समस्या र आवाजलाई संसद्मा निरन्तर उठाउनु जनप्रतिनिधिको पहिलो कर्तव्य भएको बताउनुभयो।

सांसद सिंहले जनताको ठूलो भरोसा र अपेक्षा बोकेको वर्तमान सरकारलाई असफल हुने छुट नरहेको धारणा राख्नुभयो। उहाँले सरकार पूरै पाँच वर्ष टिक्ने र सफल हुने दाबी समेत गर्नुभयो।

देशमा सकारात्मक परिवर्तन तथा विकास निर्माणका कामलाई अघि बढाउन सरकारलाई चौतर्फी सहयोग गर्दै पाँच वर्षसम्म निरन्तर काम गर्ने उहाँको भनाइ थियो।