रौतहटमा पोखरीमा डुबेर २८ वर्षीय युवकको मृत्यु

रौतहटको फतुवा विजयपुर नगरपालिका–१ बैरगिनिया टोलमा पोखरीमा डुबेर एक युवकको मृत्यु भएको छ।

मृत्यु हुनेमा स्थानीय रामहरी दासका छोरा अन्दाजी २८ वर्षीय राजेश दास रहेका छन्। दासलाई स्थानीय अरबिन्द यादवको पोखरीमा मृत अवस्थामा घोप्टो परेको अवस्थामा फेला पारिएको हो।

प्रहरीका अनुसार स्थानीयले बिहान १०:०५ बजे घटनाबारे इलाका प्रहरी कार्यालय सन्तपुर लक्ष्मिनियामा जानकारी गराएका थिए। सूचना पाएलगत्तै प्रहरी नायब निरीक्षक विनोद पासवानको कमाण्डमा टोली घटनास्थल पुगेको थियो।

घटनाको थप अनुसन्धान तथा कानुनी प्रक्रियाका लागि इलाका प्रहरी कार्यालय लक्ष्मिनिया विजयपुरबाट प्रहरी निरीक्षक रादेश कुमार खत्रीको कमाण्डमा SOCO सहितको टोली खटिएको प्रहरीले जनाएको छ। घटनाबारे थप अनुसन्धान भइरहेको छ।