सविना काफ्लेको पहिरनमाथि सूर्य थापाको टिप्पणी, ‘पम्फादेवी’ प्रसंग जोड्दै गरे कटाक्ष

बिरगंज, पर्सा, १६ कार्तिक 

काठमाडौं । नेकपा एमालेका नेता सूर्य थापाले प्रधानमन्त्री बालेन्द्र शाहकी पत्नी सविना काफ्लेको पहिरनलाई लिएर सामाजिक सञ्जालमा टिप्पणी गरेका छन्। उनले काफ्लेको पहिरनलाई पञ्चायतकालमा चर्चामा आएको ‘पम्फादेवी’ प्रसंगसँग जोड्दै व्यंग्यात्मक टिप्पणी गरेका हुन्।

प्रधानमन्त्री पत्नी काफ्ले हालै एक कार्यक्रममा रातो कार्पेटमा हिँडिरहेको तस्बिर सामाजिक सञ्जालमा भाइरल भइरहेको छ। उक्त तस्बिर फेसबुकमा सेयर गर्दै थापाले उनको पहिरन र हिँडाइलाई लिएर टिप्पणी गरेका छन्।

थापाले फेसबुकमा लेखेका छन्, ‘अहिले निलो सल लगाउँदै हिँड्ने नयाँ भेरियन्ट सार्वजनिक भयो। महेन्द्रको नक्कल गर्दै रिमिक्समा गोल्डस्टार सेतो जुत्ता, कालो टिसर्ट र कोट लगाएर संसदमा जाने अभ्यास त छँदै थियो। रातो कार्पेटमा यो निलो सल लतार्दै खच्याङखच्याङ हिँड्ने पनि पम्फादेवीकै नक्कल हो कि अरू कसैको प्रभाव छ?’

उनले प्रधानमन्त्री र फर्स्ट लेडीको पहिरनका लागि निश्चित ड्रेसकोड हुनुपर्ने मान्यताअनुसार आफूले यस्तो टिप्पणी गरेको बताएका छन्।

को हुन् पम्फादेवी?

पञ्चायतकालमा ‘पम्फादेवी’ नाम तत्कालीन रानी ऐश्वर्यसँग जोडिएर चर्चामा आएको थियो। विशेषगरी तत्कालीन राजदरबारको शक्ति, प्रभाव र आर्थिक गतिविधिसम्बन्धी आरोप तथा चर्चासँग यो नाम जोडिने गरेको थियो।

पञ्चायत व्यवस्थाको अन्तिम समय र २०४६ सालको जनआन्दोलनका क्रममा ‘पम्फादेवी’ नाम निकै चर्चित बनेको थियो। तत्कालीन दरबारको आर्थिक अपारदर्शिता र शक्तिको दुरुपयोगसम्बन्धी आरोपहरू उठ्दा यो नाम पनि सार्वजनिक बहसमा आउने गरेको थियो।

रानी ऐश्वर्यले स्विट्जरल्यान्डको बैंकमा ‘पम्फादेवी’ नाममा ठूलो रकम जम्मा गरेको भन्ने हल्लासमेत फैलिएको थियो। पञ्चायतविरोधी आन्दोलनका क्रममा ‘पम्फादेवी मुर्दावाद’ जस्ता नारासमेत लाग्ने गरेका थिए।

यद्यपि, सार्वजनिक वृत्तमा उक्त नाम रानी ऐश्वर्यसँग जोडिए पनि स्विस बैंकमा सोही नाममा ठूलो रकम रहेको भन्ने दाबी पुष्टि गर्ने ठोस सार्वजनिक प्रमाण उपलब्ध छैन।