“स्कलरसिपको प्रलोभन, अस्वीकार गर्दा धम्की” : कर्मचारीद्वारा छात्रामाथि दबाब प्रकरणमा पक्राउ

वीरगञ्ज, पर्सा — विश्वविद्यालयभित्रै एक कर्मचारीद्वारा छात्रामाथि यौन सम्बन्धका लागि दबाब, प्रलोभन र धम्की दिइएको गम्भीर घटना सार्वजनिक भएपछि शैक्षिक क्षेत्र स्तब्ध बनेको छ। घटनामा संलग्न कर्मचारी राजु गद्दीलाई प्रहरीले पक्राउ गरी अनुसन्धान अघि बढाएको छ।

‘सहयोग’ बाट सुरु, दुर्व्यवहारमा परिणत

पीडित छात्रा (नाम परिवर्तन: रुबिना) का अनुसार स्वागत कार्यक्रमकै दिन गद्दीले सहयोग गर्ने भन्दै उनलाई मोटरसाइकलमा कार्यक्रमस्थलसम्म पुर्‍याएका थिए। सोही क्रममा व्यक्तिगत जानकारी लिँदै मोबाइल नम्बर लिएका थिए।

त्यसपछि सुरु भएको सम्पर्क क्रमशः फोन र ह्वाट्सएपमार्फत अश्लील सन्देश र अनैतिक प्रस्तावमा बदलिएको पीडितको भनाइ छ।

अस्वीकारपछि धम्कीको श्रृंखला

छात्राले प्रस्ताव अस्वीकार गरी नम्बर ब्लक गरेपछि गद्दीले आफ्नो पदको दुरुपयोग गर्दै दबाब दिन थाले।

उजुरीअनुसार उनले भनेका थिए—

“नमान्यौ भने परीक्षामा मार्क्स घटाइदिन्छु, मान्यौ भने स्कलरसिप मिलाइदिन्छु।”

लगातारको मानसिक तनाव र भविष्य बिगार्ने धम्कीपछि पीडितले सम्बन्धित निकायमा उजुरी दिएकी थिइन्।

फरार हुँदै लुके, अन्ततः प्रहरी नियन्त्रणमा

उजुरी परेपछि गद्दी फरार भएका थिए। मोबाइल बन्द गरेर लुकेर बसेका उनलाई खोजी गर्दै जिल्ला प्रहरी कार्यालय पर्साले नियन्त्रणमा लिएको हो।

प्रहरीका अनुसार घटनाबारे थप अनुसन्धान भइरहेको छ र कानुनी कारबाही प्रक्रिया अघि बढाइएको छ।

थप घटना जोडिन सक्ने आशंका

स्रोतका अनुसार उनीबाट अन्य छात्राहरू पनि पीडित हुन सक्ने आशंका गरिएको छ। यता, उनलाई जोगाउन केही व्यक्तिहरू सक्रिय रहेको चर्चा समेत चलिरहेको छ।

कडा कारबाहीको माग

यस घटनापछि शैक्षिक संस्थाभित्र हुने यस्ता दुव्र्यवहार रोक्न कडा निगरानी र कडा कानुनी कारबाहीको माग चुलिएको छ।

विद्यार्थीहरूका अनुसार विश्वविद्यालयजस्तो संवेदनशील स्थानमा सुरक्षा र सम्मान सुनिश्चित गर्नु अहिलेको प्रमुख आवश्यकता बनेको छ।