स्वर्गद्वारी जाँदै गरेको भारतीय तीर्थयात्री सवार जिप दुर्घटनाः एक बालकको मृत्यु, २१ तीर्थयात्री घाइते

१० बैशाख, काठमाडौं । प्युठानको प्रसिद्ध धार्मिक स्थल स्वर्गद्वारी दर्शनका लागि जाँदै गरेका भारतीय तीर्थयात्री सवार जिप दुर्घटना हुँदा एक बालकको ज्यान गएको छ ।

स्वर्गद्वारी नगरपालिका–४ स्थित टाकुरामा लु १ ज ३१७५ नम्बरको मुस्ताङ जिप अनियन्त्रित भई सडकबाट करिब ३० मिटर तल खस्दा यो दुखद घटना भएको हो । दुर्घटनामा मृत्यु भएका बालकको पहिचान अझै खुल्न सकेको छैन ।

जिपमा सवार अन्य २१ जना तीर्थयात्री घाइते भएका छन्, जसमा पाँच जना बालबालिका समेत रहेका छन् । दुर्घटनालगत्तै स्थानीय बासिन्दा र प्रहरीको सक्रियतामा घाइतेहरूको उद्धार गरी प्राथमिक उपचारका लागि भिङ्ग्री प्राथमिक स्वास्थ्य केन्द्र पुर्‍याइएको थियो । घाइतेमध्ये १० जनाको अवस्था गम्भीर देखिएपछि उनीहरूलाई थप उपचारका लागि बुटवल रिफर गरिएको प्रहरीले जनाएको छ ।

प्रहरीको प्रारम्भिक अनुसन्धानका अनुसार तीव्र गति वा प्राविधिक गडबडीका कारण जिप अनियन्त्रित भई भीरबाट खसेको हुनसक्ने अनुमान गरिएको छ । भिङ्ग्रीबाट स्वर्गद्वारीतर्फको उकालो बाटोमा भएको यस दुर्घटनाले भारतीय तीर्थयात्रीहरू स्तब्ध बनेका छन् । घटनाको विस्तृत विवरण र मृतकको परिचय खुलाउने प्रयास भइरहेको जिल्ला प्रहरी कार्यालय प्युठानले जानकारी दिएको छ ।