कर्णाली– कर्णाली प्रदेश समन्वय परिषद्को एघारौँ बैठक सुरु भएको छ । 

मुख्यमन्त्री यामलाल कँडेलको अध्यक्षतामा आज सुर्खेत वीरेन्द्रनगरमा सुरु बैठकमा दशौँ बैठकका निर्णयहरूको पुनरावलोकन, स्थानीय तहका कर्मचारीहरूको विवरण तथा कामकाज, प्रदेश सरकार र स्थानीय तहबाट सञ्चालन हुने विकास आयोजना तथा साझा अधिकारका विषयमा समन्वय र अन्तरसम्बन्ध कायम, स्थानीय तहले प्रदेशलाई पठाउने राजस्व र आगामी आथिक वर्षको नीति तथा कार्यक्रम र बजेट तर्जुमाका सम्बन्धमा छलफल हुने जनाइएको छ । 

प्रदेश सरकारका प्रमुख सचिव वीरेन्द्रकुमार यादवका अनुसार बैठकमा प्रदेश तथा स्थानीय तहबीचको समन्वयमा थप प्रभावकारी बनाउने, बेरुजु फर्छयोटसम्बन्धी क्षमता विकास, स्थानीय तहले बनाएको कानुनको प्रदेश अभिलेखीकरण गर्ने र कानुन निर्माणका विषयमा छलफल गरी आवश्यक निर्णय गरिने छ । 

बैठकमा आर्थिक मामिला तथा योजनामन्त्री राजीविक्रम शाह, परिषद् सदस्य, नगरपालिका महासङ्घ, गाउँपालिका महासङ्घ र जिल्ला समन्वय समिति महासङ्घका प्रमुख एवं प्रतिनिधिहरू आमन्त्रित सदस्यका रूपमा सहभागी भएका छन् ।

२३ बैशाख, काठमाडौं । राजधानीको मुख्य व्यापारिक केन्द्र इन्द्रचोक क्षेत्रमा दिउँसै पेस्तोल देखाएर सुनचाँदी पसल लुट्ने प्रयास गर्ने तीनजना युवकलाई प्रहरीले नियन्त्रणमा लिएको छ ।

यही वैशाख १७ गते भेडासिंहस्थित ‘नैना एन्ड इशान ज्वेलरी’मा लुटपाटको उद्देश्यले छिरेका उनीहरू पसल सञ्चालकको साहस र प्रतिकारका कारण सफल हुन सकेका थिएनन् । जिल्ला प्रहरी परिसर काठमाडौँ र काठमाडौँ उपत्यका अपराध अनुसन्धान कार्यालयको संयुक्त टोलीले घटनामा संलग्न ललितपुर, महालक्ष्मी नगरपालिका–६ का २९ वर्षीय हरिकृष्ण महर्जन, विकेश राजवाहक र अरुण भुजेललाई पक्राउ गरेको हो ।

जिल्ला प्रहरी परिसर काठमाडौँका प्रवक्ता एसपी पवन भट्टराईका अनुसार, पक्राउ परेकामध्ये अरुण भुजेलको साथबाट घटनामा प्रयोग गरिएको पेस्तोलसमेत बरामद गरिएको छ । लुटपाटको प्रयासका क्रममा पसल सञ्चालक बबिता रौनियारले उच्च साहस देखाउँदै प्रतिकार गरेपछि लुटेरा समूह अत्तालिएर भागेको थियो ।

प्रहरीका अनुसार पक्राउ परेका हरिकृष्ण महर्जनले घटनापछि प्रहरीको आँखा छल्न आफूले लगाएको लुगा फालेर हुलियासमेत परिवर्तन गरेका थिए । यद्यपि, प्राविधिक अनुसन्धान र खोजीका क्रममा प्रहरीले उनीहरूलाई पक्राउ गर्न सफल भएको हो ।

पक्राउ परेका युवाहरू यसअघि पनि विभिन्न आपराधिक क्रियाकलापमा संलग्न रहेको प्रहरीको प्रारम्भिक अनुसन्धानले देखाएको छ । इन्द्रचोक जस्तो व्यस्त बजारमा दिउँसै हतियार देखाएर भएको यो घटनाले सुरक्षा संवेदनशीलता बढाएको भन्दै प्रहरीले यस समूहको अन्य संलग्नताबारे थप सूक्ष्म अनुसन्धान अघि बढाएको छ ।

२३ बैशाख, काठमाडौं । नेपाली बजारमा आज सुनको मूल्यमा भारी वृद्धि भएको छ । नेपाल सुनचाँदी व्यवसायी महासङ्घका अनुसार बुधबार सुनको मूल्य प्रतितोला ५ हजार ८ सय रुपैयाँले बढेर नयाँ उचाइमा पुगेको हो । सुन आज प्रतितोला २ लाख ९६ हजार ८०० रुपैयाँ पुगेको छ ।

अघिल्लो दिन अर्थात् मङ्गलबार प्रतितोला २ लाख ९१ हजार रुपैयाँमा कारोबार भएको छापावाल सुन आज ह्वात्तै बढेको हो । सुनसँगै सेतो धातु चाँदीको मूल्य पनि उकालो लागेको छ । चाँदीमा प्रतितोला १७५ रुपैयाँको वृद्धि भएसँगै आजको मूल्य ५ हजार ५५ रुपैयाँ कायम भएको छ, जुन अघिल्लो दिन ४ हजार ८८० रुपैयाँ थियो ।

अन्तरराष्ट्रिय बजारमा देखिएको उथलपुथलको प्रभाव नेपाली बजारमा सिधै देखिएको हो । हाल अन्तरराष्ट्रिय बजारमा प्रतिऔँस सुन ४ हजार ६३० अमेरिकी डलर र चाँदी ७४ अमेरिकी डलर हाराहारीमा कारोबार भइरहेको छ । विश्व बजारमा बहुमूल्य धातुको माग र लगानीकर्ताको आकर्षण बढ्दा स्थानीय बजारमा समेत ऐतिहासिक मूल्य कायम हुने क्रम जारी छ ।

२३ बैशाख, काठमाडौं । नेपाल राष्ट्र बैंकले बैंकिङ प्रणालीमा रहेको अधिक तरलता व्यवस्थापनका लागि आज बुधबार २० अर्ब रुपैयाँ बराबरको निक्षेप संकलन उपकरण जारी गर्ने भएको छ ।

केन्द्रीय बैंकले ४४ दिनको अल्पकालीन अवधिका लागि उक्त परिमाणको निक्षेप संकलन गर्न लागेको हो । बैंक तथा वित्तीय संस्थाहरूले यो उपकरण खरिदका लागि आज दिउँसो बोलकबोलमा सहभागी हुन सक्नेछन् ।

निक्षेपको ब्याजदर बोलकबोलको माध्यमबाटै निर्धारण हुने राष्ट्र बैंकले जनाएको छ । इच्छुक संस्थाहरूले न्यूनतम १० करोड रुपैयाँ र अधिकतम कुल आह्वान रकमको सीमामा रहेर आवेदन दिन सक्नेछन्। आवेदन दिँदा ५ करोड रुपैयाँले भाग जाने गरी रकम प्रस्ताव गर्नुपर्ने प्रावधान राखिएको छ ।

यस प्रक्रियामा सबैभन्दा कम ब्याजदर प्रस्ताव गर्ने बोलवालालाई प्राथमिकतामा राखी रकम बाँडफाँड गरिनेछ । एकै संस्थाले बहुब्याजदरमा पनि बोलकबोल गर्न सक्ने सुविधा दिइएको छ। संकलित निक्षेपको साँवा तथा ब्याज भुक्तानी आगामी असार ५ गते हुनेछ ।

राष्ट्र बैंकका अनुसार यो निक्षेप संकलन उपकरणमा राखिएको रकमलाई बैंकहरूले अनिवार्य नगद मौज्दातमा गणना गर्न पाउने छैनन् । तर, यसलाई सम्बन्धित संस्थाको लगानी पोर्टफोलियोको रूपमा भने राख्न सकिनेछ ।

बजारमा तरलताको अवस्था हेरी प्राप्त बोलकबोल पूर्ण वा आंशिक रूपमा स्वीकार गर्ने वा अस्वीकार गर्ने अधिकार राष्ट्र बैंकको खुला बजार कारोबार सञ्चालन समितिमा सुरक्षित रहने छ ।