२ लाख मूल्यको आधा धुर जग्गाको विवादमा ९ वर्षदेखि मुद्दा, महेन्द्र चौधरीको २० लाख खर्च

बिरगंज, पर्सा, २३ कार्तिक 

करिब २ लाख रुपैयाँ मूल्य पर्ने आधा धुर जग्गाको विवादले बारा जिल्लाका महेन्द्र चौधरीलाई ९ वर्षदेखि अदालत धाउन बाध्य बनाएको छ। सानो क्षेत्रफलको जग्गा विवादमा उनले हालसम्म करिब २० लाख रुपैयाँ खर्च गरिसकेको बताएका छन्।

प्राप्त विवरणअनुसार, उक्त जग्गासम्बन्धी मुद्दामा बारा जिल्ला अदालत र उच्च अदालत जनकपुरको अस्थायी इजलास वीरगञ्जले महेन्द्र चौधरीको पक्षमा फैसला गरिसकेका छन्। तर, प्रतिवादी देवराज साह तेलीले फैसलाविरुद्ध सर्वोच्च अदालतमा मुद्दा दायर गरेपछि विवाद अझै टुंगिन सकेको छैन।

जग्गाको मूल्य करिब २ लाख रुपैयाँ मात्रै भए पनि लामो समयसम्म चलेको कानुनी प्रक्रियाका कारण चौधरीले त्यसको मूल्यभन्दा १० गुणा बढी रकम खर्च गर्नुपरेको छ।

यता, प्रतिवादी देवराज साह तेलीले भने विवादित जग्गाको मूल्य बराबरको क्षतिपूर्ति दिन आफू तयार रहेको बताएका छन्। तर, जग्गाको मूल्यभन्दा बढी थप क्षतिपूर्ति दिन नसक्ने उनको भनाइ छ।

सामान्य मूल्यको आधा धुर जग्गाको विवादमा वर्षौंसम्म न्यायिक प्रक्रिया लम्बिँदा सेवाग्राहीले कति ठूलो आर्थिक तथा मानसिक भार खेप्नुपर्छ भन्ने यस घटनाले गम्भीर प्रश्न उठाएको छ।

अदालतबाट दुई तहमा फैसला भइसकेको अवस्थामा पनि सर्वोच्च अदालतमा मुद्दा विचाराधीन रहेकाले चौधरीले अन्तिम न्यायका लागि अझै प्रतीक्षा गर्नुपर्ने अवस्था छ।